काठमाडौँ । नेपाली राष्ट्रिय क्रिकेट टोलीका अलराउन्डर दीपेन्द्र सिंह ऐरीले आईसीसी पुरुष क्रिकेट विश्वकप लिग–२ अन्तर्गत ओमानविरुद्धको खेलमा प्लेयर अफ द म्याच बनेपछि खुशी व्यक्त गरेका छन् । ओमानविरुद्ध ६९ रन बनाएर बलिङतर्फ दुई विकेट हात पारेका उनले उत्कृष्ट अलराउन्ड प्रदर्शनका कारण यो सम्मान पाएका हुन् ।
खेलपछिको प्रतिक्रियामा दीपेन्द्रले पिच ब्याटिङका लागि निकै उपयुक्त रहे पनि विपक्षी टोलीको साझेदारीले दबाब बढाएको बताए । ‘विकेट एकदमै राम्रो थियो । रोहित र मैले पार्टनरसिप गर्दा पनि अवस्था सहज थियो । हामीलाई लागेको थियो, उनीहरूको एक–एक विकेट खस्दै गयो भने दबाब बढ्नेछ । तर उनीहरूले राम्रो साझेदारी गरे, खेल लामो हुँदै गयो, जसले अलिकति दबाब बढायो,’ उनले भने ।
यो दबाबपूर्ण खेलमा नेपालले ओमानलाई १० रनले पराजित गरेको थियो । अलराउन्डरको निर्णायक प्रदर्शनले टोलीलाई महत्वपूर्ण जित दिलाएको हो । जितसँगै लिग–२ अंक तालिकामा नेपालको स्थिति थप सुदृढ हुने अपेक्षा गरिएको छ ।
पछिल्लो समय नेपाली टोलीका लागि दीपेन्द्र महत्वपूर्ण खेलाडीका रूपमा उदाएका छन् । उनी बल र ब्याट दुवैमा टोलीको भरपर्दो हतियार मानिन्छन् । समर्थकहरूले उनको प्रदर्शनको प्रशंसा गर्दै आगामी खेलमा पनि यस्तै प्रदर्शनको अपेक्षा व्यक्त गरेका छन् ।
