फ्रान्समा बढ्दो महँगीविरुद्ध चर्किएको प्रदर्शन हिंसात्मक मोडमा पुगेपछि प्रधानमन्त्री सेबास्टियन लेकोर्नुले क्षेत्रीय प्रशासनलाई आवश्यकताअनुसार स्थानीय तथा आंशिक कर्फ्यु लगाउन आग्रह गरेका छन् । गत सोमबार पेरिसको लुभ्र सङ्ग्रहालयको प्रवेशद्वार अवरुद्ध पारेका प्रदर्शनकारीहरूले सप्ताहान्तमा देशभरका पसलहरूमा तोडफोड र लुटपाट गरेका थिए भने सार्वजनिक भवन तथा सवारीसाधनमा आगजनी भएको थियो । गृहमन्त्री लरेन्ट नुनेजले प्रहरीले अवस्थामाथिको नियन्त्रण गुमाएको बताएपछि प्रधानमन्त्रीले मन्त्रीहरूसँग आपत्कालीन बैठक गरेका थिए ।
आगामी शनिबार ‘येलो भेस्ट’ आन्दोलनले फेरि प्रदर्शन गर्ने घोषणा गरेपछि लेकोर्नुले सार्वजनिक व्यवस्था पुनःस्थापित गर्न सरकार प्रतिबद्ध रहेको र आवश्यक परे सङ्कटकाल घोषणा गर्नसमेत तयार रहेको बताएका छन् ।
गत शनिबार फ्रान्सभर करिब पाँच लाख मानिस महँगीको विरोधमा सडकमा उत्रिएका थिए । चार साताअघि विद्यालयको वातावरण सुधारको मागसहित विद्यार्थीहरूले सुरु गरेको प्रदर्शनले अहिले व्यापक जनआन्दोलनको रूप लिएको छ । मुखुन्डो लगाएका समूहहरूले सुरक्षाकर्मीमाथि आक्रमण गर्नुका साथै नगर भवनलगायत सार्वजनिक संरचनामा आगजनी र पसलहरूमा लुटपाट गरेका छन् भने प्रहरी कारबाहीमा प्रदर्शनकारीसमेत घाइते भएका छन् ।
न्यायमन्त्री जेराल्ड डारमानिनका अनुसार सप्ताहान्तमा दुई हजार ३३० भन्दा बढी मानिस पक्राउ परेका छन् भने यसअघि सार्वजनिक विवरणमा झडपका क्रममा करिब एक हजार सुरक्षाकर्मी घाइते भएको उल्लेख गरिएको थियो । राष्ट्रपति इमानुएल म्याक्रोनले गृहमन्त्री नुनेजको राजीनामा प्रस्ताव अस्वीकार गरेका भए पनि देशभर करिब ६० हजार सुरक्षाकर्मी परिचालन गरिँदासमेत सुरक्षा तथा गुप्तचर संयन्त्रमा कमजोरी रहेको स्वीकार गरेका छन् ।
वाणिज्य महासङ्घका अध्यक्ष एलेन डि क्रेसेन्जोका अनुसार हिंसाका कारण देशभर दुई हजारभन्दा बढी पसल प्रभावित भएका छन् र क्षति सयौँ मिलियन युरो पुग्ने अनुमान गरिएको छ । मार्चयता डिजेलको मूल्य करिब ४० प्रतिशत र पेट्रोलको मूल्य २५ प्रतिशतले बढेको छ भने सन् २०२१ यता खाद्यवस्तुको मूल्य पनि २५ प्रतिशतले वृद्धि भएको छ । युरोपेली सङ्घले हिंसाको निन्दा गर्दै शान्तिपूर्ण प्रदर्शनको अधिकारको रक्षा हुनुपर्ने बताएको छ । यसैबीच इटाली, बेल्जियम, स्पेन र पोर्चुगलमा पनि जीवनयापन तथा आवासको बढ्दो लागतविरुद्ध प्रदर्शन भइरहेका छन् ।
