अल अमेरात, ओमान । आईसीसी पुरुष क्रिकेट विश्वकप लिग–२ अन्तर्गत सोमबार भएको खेलमा नेपालले घरेलु टोली ओमानलाई १० रनले पराजित गर्दै महत्त्वपूर्ण जित दर्ता गरेको छ।
ओमानको अल अमेरात क्रिकेट मैदानमा पहिले ब्याटिङ गरेको नेपालले ५० ओभरमा सबै विकेट गुमाउँदै २ सय ८० रन बनाएको थियो। नेपाली इनिङ्समा कप्तान रोहित पौडेलले ८०, दीपेन्द्रसिंह ऐरीले ६९ र देव खनालले ५७ रनको योगदान दिए। ओमानका शाह फैसलले ५ विकेट लिँदै नेपाललाई ठूलो स्कोरबाट रोके।
जवाफमा ब्याटिङ गरेको ओमानले निर्धारित ५० ओभरमा ७ विकेट गुमाएर २ सय ७० रन मात्र बनाउन सक्यो। जतिन्दर सिंहले ८९ र हम्माद मिर्जाले ८७ रन बनाए पनि टोलीलाई जित दिलाउन सकेनन्। बलिङतर्फ नेपालका ललित राजवंशी र दीपेन्द्रसिंह ऐरीले समान २–२ विकेट लिए।
यो जितसँगै नेपालले आफ्नो एकदिवसीय अन्तर्राष्ट्रिय (ओडीआई) हैसियत जोगाएको छ।
