कात्तिक १ गतेदेखि सीमित रूपमा खुलाइएको नेपाल–चीन तातोपानी नाकालाई निरन्तर सञ्चालनमा ल्याउन माग गरिएको छ । हप्तामा तीन दिन मात्रै खुल्ने व्यवस्थाले चाडपर्व लक्षित सामान सीमापार रोकिने जोखिम बढेको व्यवसायीहरूको भनाइ छ ।
नेपाल हिमालय सीमापार बाणिज्य संघका महासचिव रामचन्द्र पराजुलीले चीनको सिचाङस्थित न्यालम क्षेत्रमा दसैं–तिहारजस्ता चाडपर्वलक्षित सामग्री बोकेका ४५ भन्दा बढी कन्टेनर रोकिएको बताए । तीमध्ये ठूलो हिस्सा नाशवान् वस्तु, कृषि उत्पादन तथा मौसमी व्यापारिक सामग्री रहेको र यी सामान छिट्टै बिग्रने जोखिममा रहेको उनको भनाइ छ ।
संघले चीन सरकार र नेपालस्थित चिनियाँ दूताबासलाई ध्यानाकर्षण पत्र बुझाएर नाका पूर्ण रूपमा खोल्न माग गरिसकेको पराजुलीले बताए । अन्य नाका बन्द रहेको अवस्थामा दुई देशको व्यापार सहज पार्न तातोपानी नाका निरन्तर चल्नु आवश्यक भएको उनले बताए ।
यसैबीच तातोपानी भन्सार कार्यालयका भन्सार अधिकृत नरेन्द्रसिंह चैसिरका अनुसार आइतबार तीन वटा र सोमबार साँझसम्म सात वटा गरी दुई दिनमा जम्मा १० कन्टेनर भित्रिएका छन् । चीनले कार्गो ट्रकलाई मात्र अनुमति दिएकाले साना कन्टेनर आउन नसकेको उनको भनाइ छ । भित्रिएका कन्टेनरमा फलफूल, जुत्ता, तयारी पोशाक र कृषि सामग्री रहेको उनले जानकारी दिए ।
