गाजा क्षेत्रमा सप्ताहान्तका क्रममा गरिएको हवाई आक्रमणमा हमासका सैन्य विभागका तीन सदस्य मारिएका छन् । इजरायली सेनाले विज्ञप्तिमार्फत यस्तो दाबी गरेको हो ।
सेनाले जनाएअनुसार गाजा सहरको तुफाह इलाकामा लक्ष्य गरी गरिएको कारबाहीमा अब्दुल्लाह मोहम्मद खमिस जाबेर मारिए । उनी हतियार बनाउने काममा संलग्न रहेको सेनाको आरोप छ । सोही क्षेत्रको अर्को आक्रमणमा इकाइ कमाण्डरका रूपमा पहिचान गरिएका माजेद अहमद मुस्तफा सब्बागको पनि ज्यान गएको सेनाले बतायो ।
त्यस्तै, उत्तर गाजाको जबालिया क्षेत्रमा गरिएको कारबाहीमा इन्जिनियरिङ बटालियनका सदस्य आमेर बसिर मोहम्मद खौरानी मारिए । इजरायली सेनाको भनाइमा मारिएका तीनै जना पछिल्लो समय इजरायली सैनिकविरुद्धका हमलामा संलग्न थिए र उनीहरू हमासको सैन्य क्षमता फेरि मजबुत पार्ने प्रयासमा लागेका थिए ।
आक्रमण गर्नुअघि सर्वसाधारणको क्षति घटाउन सटीक निशानायुक्त हतियार र हवाई निगरानीको व्यवस्था अपनाइएको सेनाको दाबी छ । यद्यपि, उक्त विज्ञप्तिमा आक्रमणबाट सर्वसाधारणमा परेको असरबारे विस्तृत जानकारी दिइएको छैन ।
