काठमाडौं । चाडपर्वको भीडभाडको मौका छोपेर काठमाडौं भित्र्याउन खोजिएको ठूलो परिमाणको लागूऔषध प्रहरीले बरामद गरेको छ । दक्षिणकाली नगरपालिका–५ स्थित फर्पिङ बसपार्कमा आइतबार बिहान गरिएको चेकजाँचका क्रममा प्रहरीले ७२ हजार ८० क्याप्सुल ट्रामाडोल फेला पारेको हो ।
प्रहरीका अनुसार बिहान करिब ४:३० बजे इलाका प्रहरी कार्यालय फर्पिङबाट खटिएको टोलीले वीरगन्जबाट काठमाडौं आउँदै गरेको कार रोकेर जाँच गर्दा लागुऔषध बरामद भएको हो । बा.२० च. ७५८८ नम्बरको कारको पछाडिको डिक्कीमा लुकाइछिपाइ राखेर ल्याइएको ट्रामाडोल क्याप्सुल जाँचकै क्रममा फेला परेको थियो ।
यस प्रकरणमा प्रहरीले दुई जनालाई नियन्त्रणमा लिएको छ । पक्राउ पर्नेमा बारा जिल्लाको कलैया उपमहानगरपालिका–२३ कोयरियाका २७ वर्षीय सुदिप पटेल र पर्सा जिल्लाको वीरगन्ज महानगरपालिका–१७ अलौका २७ वर्षीय सुनिल सहनी छन् ।
जिल्ला प्रहरी परिसर काठमाडौंका प्रवक्ता तथा सूचना अधिकारी प्रहरी उपरीक्षक दानबहादुर थापाका अनुसार बरामद लागुऔषधसहित नियन्त्रणमा लिइएका दुवै जनामाथि थप अनुसन्धान भइरहेको छ । बरामद लागुऔषध र पक्राउ परेकाहरूलाई थप कानुनी प्रक्रिया अगाडि बढाइने प्रहरीले जनाएको छ ।
