मालीको उत्तरपूर्वी मेनाका क्षेत्रमा सशस्त्र समूहले आइतबार गरेको आक्रमणमा करिब ५० सर्वसाधारणको ज्यान गएको छ । सुरक्षा अधिकारी र स्थानीय स्रोतका अनुसार आक्रमणमा मुख्यतः दौसहाक समुदायका बासिन्दा निशानामा परेका हुन् ।
मोटरसाइकलमा आएका हतियारधारीले टिनाबो गाउँ र तगादायत क्षेत्रका शिविरमा गोली चलाउनुका साथै घरहरूमा आगो लगाएका थिए । दौसहाक समुदायको कार्यकारी ब्युरोले हत्यामा इस्लामिक स्टेट समूहको हात रहेको आरोप लगाएको छ । ब्युरोका अनुसार तगादायतमा मात्र ४८ जना सर्वसाधारण मारिएका छन् ।
एक सुरक्षा स्रोतले एमएसए सशस्त्र आन्दोलन र सेनाको हालैको कारबाहीको बदलामा यो हिंसा भएको बताएको छ । दौसहाक समुदायबाटै उदाएको एमएसए मालीको सैनिक सरकारसँग निकट छ । स्थानीय अधिकारीले महिला र वृद्धसहित ५० भन्दा बढीको मृत्यु भएको जनाएका छन् ।
आक्रमणबाट विस्थापित भएकाहरू मेनाका पुगेका छन् । ब्युरोले घटनालाई नरसंहार भन्दै निन्दा गरेको छ र विस्थापितका लागि तत्काल मानवीय सहायता दिन अपिल गरेको छ ।
यसैबीच, मालीको सेनाले शनिबार मेनाकाबाट झन्डै ६५ किलोमिटर दक्षिणपश्चिममा रहेको चरमपन्थीको प्रमुख आधारमा सैन्य कारबाही गरेको जनाएको छ ।
माली सन् २०१२ देखि जिहादी लडाकू, तुआरेग पृथकतावादी र आपराधिक समूहको हिंसाबाट प्रभावित छ । सन् २०२० र २०२१ का सैनिक विद्रोहपछि सत्तामा आएको सैनिक सरकारले रुसको सहयोग लिएको छ । वागनर समूहका अर्धसैनिक बल सन् २०२५ मा अफ्रिका कोरमा रूपान्तरण भएका थिए ।
