काठमाडौं । नेपाली क्रिकेट टोलीका पूर्वकप्तान विनोद दास मलेसियन क्रिकेट संघको प्रमुख सञ्चालन अधिकृत (सीओओ) मा नियुक्त भएका छन्। संघले मंगलबार आफ्नो आधिकारिक फेसबुक पेजमार्फत दासको नियुक्तिको औपचारिक घोषणा गरेको हो।संघले जारी विज्ञप्तिमा क्रिकेट सञ्चालन, प्रशिक्षण तथा उच्च प्रदर्शनका कार्यक्रमहरूमा दाससँग फराकिलो अन्तर्राष्ट्रिय अनुभव रहेको उल्लेख गरेको छ। दासको अनुभवले संघका सञ्चालन व्यवस्थापन तथा उच्च प्रदर्शनसम्बन्धी कार्यक्रमलाई अझ प्रभावकारी बनाउन मद्दत पुग्ने विश्वास संघले व्यक्त गरेको छ।दास नेपाली राष्ट्रिय क्रिकेट टोलीका पूर्वकप्तान हुन्। खेलाडी जीवनपछि उनी क्रिकेटको प्रशिक्षण, खेल सञ्चालन तथा विकासका क्षेत्रमा सक्रिय रहँदै आएका छन्। उनको यो नियुक्तिले नेपाली क्रिकेट कर्मीको अन्तर्राष्ट्रियस्तरको पहिचानलाई अझ बलियो बनाएको छ।मलेसियन क्रिकेट संघले मंगलबार नै फेसबुकमार्फत दासलाई नयाँ प्रमुख सञ्चालन अधिकृतका रूपमा स्वागत गरेको जनाएको छ। संघको यो निर्णयले आगामी दिनमा मलेसियन क्रिकेटको संस्थागत संरचना र प्रदर्शन व्यवस्थापनलाई नयाँ उचाइ दिने अपेक्षा गरिएको छ।