काठमाडौँ — जल तथा मौसम विज्ञान विभागले आगामी तीन दिनको मौसम पूर्वानुमान सार्वजनिक गरेको छ। दसैँको मुखमा निस्किएको पूर्वानुमानअनुसार केही हिमाली तथा पहाडी भू-भागमा आंशिक बदलीसहित हल्का वर्षा र हिमपातको सम्भावना छ भने तराईका धेरैजसो ठाउँमा मौसम सफा रहनेछ।
आज (कात्तिक २ गते, सोमबार) दिउँसो कोशी, बागमती, गण्डकी र लुम्बिनी प्रदेशका हिमाली तथा पहाडी भू-भागका साथै कर्णाली र सुदूरपश्चिम प्रदेशका हिमाली क्षेत्रमा आंशिक बदली रहनेछ। देशका हिमाली भू-भागका साथै कोशी, बागमती र गण्डकी प्रदेशका पहाडी भेगका एक-दुई स्थानमा मेघगर्जन र चट्याङसहित हल्का वर्षा र हिमपात हुनसक्नेछ। आज राति कोशी र गण्डकी प्रदेशको हिमाली क्षेत्रका एक-दुई स्थानमा पनि हल्का वर्षा र हिमपातको सम्भावना छ।
भोलि (कात्तिक ३ गते, मङ्गलबार) कोशी, बागमती र गण्डकी प्रदेशका हिमाली तथा पहाडी भू-भागका केही स्थानमा मेघगर्जनसहित हल्का वर्षा र हिमपात हुनसक्नेछ। तराईमा मौसम मुख्यतया सफा रहे पनि बिहानपख केही स्थानमा हुस्सु र कुहिरो लाग्नेछ।
पर्सि (कात्तिक ४ गते, बुधबार) पनि हिमाली र पहाडी भू-भागमा आंशिक बदली रहनेछ। कोशी, बागमती र गण्डकी प्रदेशका पहाडी तथा देशका हिमाली भू-भागका एक-दुई स्थानमा वर्षा र हिमपात हुनसक्ने विभागले जनाएको छ। तराईमा बिहानको कुहिरोका कारण भिजिबिलिटी घट्ने भएकाले आवश्यक सतर्कता अपनाउन विभागले अनुरोध गरेको छ।
