काठमाडौँ । सार्वजनिक लेखा समितिअन्तर्गत गठन भएको अध्ययन उपसमितिकी संयोजक खुश्बु ओलीले प्रतिवेदन सार्वजनिक हुनुअघि सरकारले प्रहरी महानिरीक्षक दानबहादुर कार्कीलाई पदबाट नहटाउने विश्वास व्यक्त गरेकी छन् । राष्ट्रिय प्रजातन्त्र पार्टीकी प्रमुख सचेतकसमेत रहेकी ओली निर्वाचनमा प्रयोग हुने प्रहरी पोसाक खरिदसम्बन्धी विषयमा अध्ययन गरिरहेको उपसमितिको नेतृत्वमा छिन् ।
उपसमितिको बैठकपछि सञ्चारकर्मीहरूसँग कुरा गर्दै उनले अध्ययन पूरा नहुँदै सरकारले कुनै हस्तक्षेप गर्ने अवस्था नरहेको बताइन् । सरकारले आफैँ अध्ययनको जिम्मेवारी दिएर समिति बनाएकाले त्यसको काममा अवरोध पुर्याएर आफैँ निर्णय लिने सम्भावना नरहेको उनको भनाइ थियो । आधिकारिक निष्कर्ष नआएकाले यस विषयमा थप टिप्पणी गर्न नचाहेको उनले स्पष्ट पारिन् ।
सञ्चारमाध्यममा आएका समाचार र उपसमितिको बैठकबिच कुनै सम्बन्ध नरहेको दाबी गर्दै ओलीले बैठक पहिल्यै तय भएको जानकारी दिइन् । नेपालमा कुनै विषय सार्वजनिक हुनासाथ त्यसबारे पहिले नै धारणा बनाइने प्रवृत्ति रहेको उल्लेख गर्दै उनले समाचार र बैठकलाई जोडेर हेर्न नमिल्ने बताइन् ।
अध्ययन सकिनुअघि नै कुनै निष्कर्षमा पुग्नु न्यायोचित नहुने उनको भनाइ छ । उपसमितिले अध्ययनका क्रममा कसैलाई दोषी ठहर गर्ने वा उन्मुक्ति दिने पूर्वधारणाबाट मुक्त रहेर निष्पक्ष रूपमा काम गर्ने उनले बताइन् । प्राप्त तथ्य र प्रमाणका आधारमा मात्र प्रतिवेदन तयार गरिने उनको भनाइ छ ।
अध्ययन अझै प्रारम्भिक चरणमा रहेको जानकारी दिँदै उनले दसैँका कारण बिचमा लामो समय बितेकाले अपेक्षित प्रगति हुन नसकेको बताइन् । तर सदस्यहरूले व्यक्तिगत रूपमा अध्ययन जारी राखेको उनले उल्लेख गरिन् ।
