काठमाडौँ । चालु आर्थिक वर्ष २०८३/८४ को तेस्रो महिना असोजमा मात्र नेपालमा पाँच हजारभन्दा बढी कार, जिप र भ्यान भित्रिएका छन् । भन्सार विभागले बुधबार सार्वजनिक गरेको तथ्यांकअनुसार सो अवधिमा कुल ५ हजार ५७ युनिट चारपाङ्ग्रे यात्रुवाहक सवारी आयात भएका हुन् । यी सवारीको मूल्य ९ अर्ब ४७ करोड रुपैयाँ बराबर छ भने त्यसबाट सरकारले ७ अर्ब ७३ करोड रुपैयाँ राजस्व प्राप्त गरेको छ ।
आयात भएका सवारीमध्ये सबैभन्दा ठूलो हिस्सा विद्युतीय सवारीको छ । असोजमा ३ हजार ८०२ युनिट विद्युतीय कार, जिप र भ्यान भित्रिएका छन् । ती सवारी ८ अर्ब ३५ करोड रुपैयाँ बराबरका हुन् र त्यसबाट ४ अर्ब ८७ करोड रुपैयाँ राजस्व उठेको छ । असोजमा १ हजार ८३ युनिट पेट्रोल कार र ८४ वटा डिजेल कार पनि भित्रिए ।
तथ्यांकले विद्युतीय सवारीतर्फको आकर्षण निरन्तर बढिरहेको देखाउँछ । भदौमा २ हजार १४५ युनिट विद्युतीय कार, जिप र भ्यान आयात भएका थिए, जुन साउनको ६८९ युनिटको तुलनामा तीन गुणाभन्दा बढी हो । भदौमा भित्रिएका कुल यात्रुवाहक सवारीमध्ये ८१ दशमलव ५ प्रतिशत हिस्सा विद्युतीय गाडीको थियो ।
समग्रमा चालु आर्थिक वर्षको पहिलो तीन महिनामा करिब १६ अर्ब रुपैयाँभन्दा बढी मूल्यका सवारी साधन भित्रिएका छन् र त्यसबाट १२ अर्ब रुपैयाँभन्दा बढी राजस्व दाखिला भएको छ । डोङफेङ नामी भिगो सबैभन्दा धेरै आयात भएको छ, जसको ८२९ युनिट एमएडब्लू वृद्धिले भित्र्याएको हो । बीवाइडी एटो २ दोस्रो स्थानमा छ, जसको ६३८ युनिट साइमेक्स इंकले ल्याएको हो ।
