पर्वतको जलजला गाउँपालिकामा मनसुनजन्य विपद्बाट क्षति पुगेका पहिरोग्रस्त क्षेत्रको भौगर्भिक अध्ययन सुरु भएको छ । राष्ट्रिय विपद् जोखिम न्यूनीकरण तथा व्यवस्थापन प्राधिकरणबाट आएका भूगर्भविद्सहितको टोलीले म्याग्दीको सदरमुकाम बेनी बजारसँग जोडिएको जलजलाका पहिरो प्रभावित बस्तीको स्थलगत अध्ययन गरिरहेको छ ।
भूगर्भविद् सुमन पाण्डे र सन्देश रेग्मीसहितको टोलीले मंगलबार फर्से, किराखोर, खानीगाउँ र ताङवाङका पहिरोको अध्ययन गरेको गाउँपालिकाका उपाध्यक्ष दीपक आचार्यले जानकारी दिए । उनका अनुसार टोलीले बुधबार केराबारी, पुलचोक र भेडाबारी क्षेत्रको पहिरोको अध्ययन गर्ने छ । क्षति पुगेका बस्तीमा थप जोखिम पहिचान गर्न गाउँपालिकाको अनुरोध र जिल्ला विपद् व्यवस्थापन समितिको सिफारिसका आधारमा प्राधिकरणले टोली पठाएको हो ।
टोलीले क्षति भएका र जोखिममा रहेका बस्तीको स्थलगत निरीक्षण गर्नुका साथै ढुंगा र माटोको नमूना संकलन गरेको छ भने ड्रोन क्यामेराबाट तस्बिर र श्रव्यदृश्य सामग्री समेत लिएको छ । प्रभावितसँग छलफल गरेर तयार पारिने अध्ययन प्रतिवेदनको सुझावका आधारमा पुनर्निर्माणको काम अघि बढाइने उपाध्यक्ष आचार्यले बताए ।
गत असोज ८ देखि ११ गतेसम्मको झरीपछि कालीगण्डकी नदीमा आएको बाढी र पहिरोका कारण जलजलामा ३१६ घरमा क्षति पुगेको छ । गाउँपालिकाका अध्यक्ष राजुप्रसाद आचार्यका अनुसार १२६ घर पूर्ण र ५० घरमा आंशिक क्षति पुगेको छ भने १४० घर जोखिममा छन् । बाढीपहिरोले निजी आवाससँगै कोदो र धानलगायत खाद्यबाली, सुन्तलाखेती, सडक, खानेपानी र सिँचाइका पूर्वाधारमा ठूलो क्षति पुगेको छ ।
सबैभन्दा बढी जलजला–८ फर्सेमा ७५ घर बगाएको छ भने २७ घर जोखिममा छन् । घर नभएका प्रभावितलाई अस्थायी शिविरमा राखिएको छ । वडा नं ७ का ताङवाङ र खानीगाउँ पनि प्रभावित भएका छन् भने वडा नं ४ को लामाखेतमा समेत कालीगण्डकीको बाढी पसेर क्षति पुगेको छ । पहिरोका कारण ताङवाङ र खानीगाउँका ३५ परिवार विस्थापित भएका छन् ।
