काठमाडौं । नेपाल प्रिमियर लिगमा चितवन राइनोजसँगको रोमाञ्चक खेलमा पराजित भएपछि विराटनगर किङ्सका कप्तान सन्दीप लामिछानेले खेल नियन्त्रणमा हुँदाहुँदै अन्तिम समयमा चुक्दा पराजय भोग्नुपरेको बताएका छन्।
मंगलबार खेलपछिको पत्रकार सम्मेलनमा बोल्दै उनले पहिलो इनिङ्सका २० ओभर र दोस्रो इनिङ्सका १६ ओभरसम्म खेल पूर्ण रूपमा आफ्नो टोलीको नियन्त्रणमा रहेको बताए। तर खेल नसकिँदासम्म त्यसलाई सहज रूपमा लिन नहुने ठूलो पाठ त्यस दिन मिलेको उनको भनाइ थियो।
अन्तिम समयमा हतारिएर लगातार विकेट गुमाउनु र गलत सट छान्नु नै पराजयको मुख्य कारण बनेको सन्दीपले बताए। उनका अनुसार अन्तिम पाँच विकेट हतारमा खसे, र अर्को छेउमा राम्रो लयमा रहेका ब्याटरलाई स्ट्राइक दिन नसक्दा टोली पछाडि पर्यो।
जितिसकेको खेल हातबाट उम्किनु स्वीकार्य नभए पनि प्रतियोगिताको सुरुआती चरणमै यस्तो गल्तीबाट सिक्ने अवसर मिलेको उनले बताए। टप अर्डरदेखि मिडल अर्डरसम्म योगदान भए पनि तल्लो क्रमले जितलाई विपक्षीको पोल्टामा सुम्पिएको उनको भनाइ थियो।
सन्दीपले १७०–१७५ रन बन्न सक्ने पिचमा चितवनलाई १५६ रनमै रोकिएको बताए। बलिङ र ब्याटिङ दुवैतर्फ राम्रो प्रदर्शन भइरहे पनि अन्तिमका तीन–चार ओभरमा चितवनले उत्कृष्ट पुनरागमन गरेको उनले स्वीकारे। युवा खेलाडीको मूल्याङ्कन गर्न अहिले हतार हुने भन्दै उनले एक महिना लामो प्रतियोगितामा धैर्य राखेर अघि बढ्नुपर्ने बताए। टोलीले आगामी खेलमा गल्ती सच्याउँदै अझ सशक्त रूपमा मैदानमा उत्रिने प्रतिबद्धता पनि उनले व्यक्त गरे।
