दशैँको चहलपहलपछि जुम्लाका किसान अहिले खेतमा मार्सी धान काट्ने चटारोमा परेका छन्। बिहानदेखि साँझसम्म किसानहरू धान स्याहार्नै व्यस्त भएका छन्।तातोपानी गाउँपालिकाका स्थानीय सुनीता पाण्डेका अनुसार यस याममा किसानलाई धान काट्न भ्याइनभ्याइ भएको छ। दशैँ मनाउनेभन्दा धान स्याहार्ने काममा किसान बढी व्यस्त देखिएका छन्।कृषि विकास कार्यालय जुम्लाका प्रमुख रामभक्त अधिकारीले मार्सी धान जुम्लाको पहिचानसँग जोडिएको बताए। उनका अनुसार मार्सी खेतीको आफ्नै समय हुने भएकाले यो बेला किसानहरू धान भित्र्याउन फाँटहरूमा व्यस्त हुन्छन्।कार्यालयका अनुसार जिल्लाभर करिब दुई हजार ८५० हेक्टरमा धानखेती हुन्छ। गत वर्ष एक हजार ५०० हेक्टरमा रोपिएको मार्सी धान यस वर्ष भने एक हजार २०० हेक्टरमा मात्र रोपिएको छ। साथै, कृषि अनुसन्धान केन्द्रले सिफारिस गरेका चन्दननाथ–१, चन्दननाथ–३, लेकाली–१ र लेकाली–३ जातका धान पनि किसानले लगाएका छन्।