पूर्वउपप्रधानमन्त्री टोपबहादुर रायमाझी आगामी कात्तिक २६ गते कारागारबाट छुट्ने भएका छन्। नक्कली भुटानी शरणार्थी प्रकरणमा दोषी ठहरिएका उनी अहिले काठमाडौंको डिल्लीबजार कारागारमा छन्। काठमाडौं जिल्ला अदालतले उनलाई सोही दिन रिहा गर्न आदेश दिएको छ।
कारागारका जेलर बिक्रम पाण्डेका अनुसार रिहाइको आदेश सोमबार कारागारमा आइपुगेको थियो। रायमाझीले ६५ वर्ष पुगेका जेष्ठ नागरिकलाई पाइने सुविधा माग गर्दै निवेदन दिएका थिए। गत शुक्रबार न्यायाधीश राजेन्द्र सिंह भण्डारीको इजलासले उक्त सुविधा दिने निर्णय गर्दै रिहाइको आदेश दिएको हो।
जेष्ठ नागरिकसम्बन्धी ऐन, २०६३ को दफा १२ मा ६५ वर्ष पूरा गरी ७० वर्ष ननाघेका नागरिकलाई सजायमा २५ प्रतिशतसम्म छुट दिन सकिने व्यवस्था छ। गत असार ३० गते जिल्ला अदालतले रायमाझीलाई ठगी, राज्यविरुद्धको कसुर र संगठित अपराधमा दोषी ठहर गर्दै चार वर्ष कैद सुनाएको थियो। उनी २०८० सालको मंसिरदेखि थुनामा छन्।
फैसलाअनुसार ठगीमा दुई वर्ष कैद र २० हजार रुपैयाँ जरिवाना, संगठित अपराधमा तीन वर्ष कैद र ३० हजार जरिवाना, राज्यविरुद्धको कसुरमा डेढ वर्ष कैद र १५ हजार जरिवाना तथा एकीकृत कसुरमा चार वर्ष कैद र ४० हजार जरिवाना तोकिएको थियो। सबैभन्दा बढी सजाय चार वर्ष भएकाले उनले त्यही अवधि कैद बस्नुपर्ने थियो भने सबै कसुरको जरिवाना तिर्नुपर्ने थियो। जेष्ठ नागरिकको सुविधा पाएपछि उनी कात्तिक २६ गते छुट्नेछन्।
