मधेस प्रदेश सरकारले गरेको कर्मचारी सरुवामा विभेद र चलखेल भएको आरोप लगाउँदै अभियन्ताहरूले मंगलबार जनकपुरधाममा सांकेतिक विरोध प्रदर्शन गरेका छन्। चुरे तथा वनजंगल संरक्षण अभियानका अभियन्ताहरूले मधेस भवनको मुख्य प्रवेशद्वार अगाडि मुखमा कालो कपडा बाँधेर करिब एक घण्टा धर्ना दिएका हुन्।
प्रदर्शनकारीहरूले १५ देखि २५ वर्षसम्म एउटै कार्यालयमा कार्यरत कर्मचारीको सरुवा किन नगरिएको भन्दै प्रदेश सरकारसँग जवाफ मागेका छन्। सरुवाको समयावधि पूरा भएका कर्मचारीलाई नराख्नुको कारण र त्यसमा कसको शक्ति र पहुँचले काम गरेको हो भन्ने प्रश्न पनि उनीहरूले उठाएका छन्। सबै कर्मचारीमाथि समान मापदण्ड लागू गर्न र राजनीतिक तथा व्यक्तिगत स्वार्थका आधारमा सरुवा रोक्ने प्रवृत्ति अन्त्य गर्न उनीहरूको माग छ।
धर्नाका क्रममा ‘महिला तथा नवप्रवेशी कर्मचारीमाथिको उत्पीडन बन्द गर’, ‘स्वाभिमान र कार्यसुरक्षा लागू गर’, ‘गैरकानुनी लाभ आर्जन गर्ने सञ्जाल भंग गर’ र ‘भ्रष्ट अधिकारीमाथि कारबाही गर’ लगायतका नारा लेखिएका प्लेकार्ड प्रदर्शन गरिएका थिए।
अभियानका संयोजक सुनिल यादवले वन निर्देशनालयसहित विभिन्न वन कार्यालयमा १० देखि २५ वर्षसम्म एउटै कार्यालयमा बसेका कर्मचारीको सरुवा नभएको आरोप लगाए। उनले सरुवाको निर्णय सच्याउनुपर्ने माग गरे। यसअघि सरुवाको निर्णय सच्याउन माग गर्दै वन निर्देशनालयमा ज्ञापनपत्र बुझाइएको थियो।
अर्का अभियन्ता राजेश भण्डारीले वन मन्त्रालय मात्र नभई शिक्षा, स्वास्थ्य, यातायात र उद्योग मन्त्रालयमा पनि सरुवा प्रक्रिया निष्पक्ष नभएको आरोप लगाए। प्रदर्शनपछि अभियन्ताहरूले मुख्यमन्त्री तथा मन्त्रिपरिषद्को कार्यालयमा ज्ञापनपत्र बुझाएका छन्। संयोजक यादवले छठ पर्वपछि आन्दोलन थप चर्काउने चेतावनी दिएका छन्।
