गान्तोक । सिक्किमको राजधानी गान्तोकस्थित पाल्जोर रंगशालामा भएको नेपथ्यको प्रस्तुति स्थानीय दर्शकका लागि ऐतिहासिक क्षण बनेको छ । आइतबार राति भएको कन्सर्टमा रंगशाला भरिएर बाहिरसमेत दर्शकको ठूलो भीड देखिएको थियो ।
यो कन्सर्ट शनिबार हुने गरी तय भएको थियो । बंगालको खाडीमा विकसित चक्रवात अर्नबको प्रभावले पानी पर्ने जोखिम देखिएपछि कार्यक्रम एक दिन सारेर आइतबार गरिएको थियो । तोकिएको समयमा सुरु भएको प्रस्तुतिमा ब्यान्डका नयाँ र पुराना गीतहरूले दर्शकलाई झुमाएका थिए ।
स्थानीय उत्तम लेप्चाका अनुसार सिक्किममा यति विशाल जमघट यसअघि देखिएको थिएन । कन्सर्ट सकिएपछि पनि सडकमा गाउँदै र नाच्दै हिँड्नेहरूको भीड थियो । भीड नियन्त्रणका लागि ठूलो संख्यामा सुरक्षाकर्मी परिचालन गरिएको थियो ।
गायनकै क्रममा ब्यान्डका अगुवा अमृत गुरुङले रसुवामा बाढी आउँदा सिक्किमले पठाएको राहत सम्झँदै दुई ठाउँबीचको सम्बन्ध सदैव कायम रहोस् भन्ने कामना गरे । सिक्किममा नेपाली भाषा आम प्रचलनमा रहे पनि अहिलेको पुस्तामा लेखपढ घट्दै गएको भन्दै उनले नेपाली लेखन र पठनलाई प्राथमिकता दिन आग्रह गरे ।
कन्सर्ट हेर्न मिजोरमको लुङ्लेबाट आशिष क्षेत्री र भुटानको चिराङबाट १४ घण्टा मोटरयात्रा गरेर लोकी खरेल पनि गान्तोक पुगेका थिए । स्थानीय आयोजक पोजिटिभ भाइब्सले नौ महिना लामो प्रयासपछि यस्तो स्मरणीय साँझ सम्भव भएको जनाएको छ । सिक्किमपछि ब्यान्ड कात्तिक १८ मा इटहरी र कात्तिक २१ मा झापाको चारआलीमा प्रस्तुत हुनेछ ।
