झापाको बिर्तामोडमा आज भएको ठूलो आगलागीले करिब छ करोड रुपैयाँ बराबरको क्षति पुर्याएको छ। आगोले एउटा इलेक्ट्रोनिक्स पसल, एउटा फार्मेसी र दुईतले पक्की घर पूर्ण रूपमा नष्ट गरेको छ।
बिर्तामोड नगरपालिका–४ मा सिद्धार्थ होटलनजिकै रहेको राजेश मण्डलको घरमा आगो लागेको थियो। घरको दोस्रो तलामा विद्युत् सर्ट भएर आगलागी सुरु भएको हुन सक्ने प्रारम्भिक अनुमान गरिएको छ। जिल्ला प्रहरी कार्यालय झापाका सूचना अधिकारी प्रहरी नायब उपरीक्षक रञ्जन अवालले सो जानकारी दिएका हुन्।
आगलागीबाट शुभलाभ इलेक्ट्रोनिक्स पसल तथा त्यसको गोदाममा करिब तीन करोड रुपैयाँ, निरिका फार्मेसी तथा गोदाममा करिब एक करोड रुपैयाँ र घरधनी मण्डलको घरमा करिब दुई करोड रुपैयाँ बराबरको क्षति भएको प्रहरीले जनाएको छ। आगो छिमेकका घरहरूमा समेत फैलिएको थियो।
आगो नियन्त्रणका लागि बिर्तामोड, भद्रपुर, मेचीनगर, दमक, कमल, शिवसताक्षी र गौरादहबाट सातवटा दमकल परिचालन गरिएका थिए। नेपाली सेना, नेपाल प्रहरी, सशस्त्र प्रहरी बल र स्थानीयवासीसमेत आगो निभाउन खटिएका थिए। घण्टौँको प्रयासपछि आगो नियन्त्रणमा आएको प्रहरीले जनाएको छ।
