काठमाडौं । भोटेकोशी बाढीले क्षतिग्रस्त पूर्वाधारको पुनर्निर्माणमा भारतले सघाउने भएको छ । प्रधानमन्त्री बालेन्द्र शाहको प्रस्तावित भारत भ्रमणको तयारीका लागि बुधबार काठमाडौं आएका भारतीय विदेश सचिव विक्रम मिश्रीले पुनर्निर्माण र पुनःस्थापनाको चरणमा आवश्यक सहयोग गर्न भारत तयार रहेको बताएका हुन् ।
परराष्ट्र सचिव अमृतबहादुर राईसँगको द्विपक्षीय छलफलमा मिश्रीले बाढीले नेपालको पूर्वाधारमा ठूलो क्षति पुगेको उल्लेख गर्दै सहयोगका प्रस्तावमा भारतले विचार गर्ने बताए । उनले बाढीपछिको राहतमा भारतले सघाएको स्मरण गर्दै अब पुनर्निर्माणको चरणमा पनि सहकार्य जारी राख्न भारत इच्छुक रहेको बताए । यस विषयमा प्रारम्भिक छलफल भइसकेको र थप विस्तृत छलफल गर्न भारत तयार रहेको उनको भनाइ थियो ।
मिश्रीले बुधबार परराष्ट्रमन्त्री शिशिर खनाल, ऊर्जामन्त्री विराजभक्त श्रेष्ठ, अर्थमन्त्री स्वर्णिम वाग्ले र पूर्वाधार विकासमन्त्री सुनील लाम्सालसँग छुट्टाछुट्टै भेटवार्ता गरे । बिहीबार उनले प्रधानमन्त्री शाहसँग भेट्ने कार्यक्रम छ ।
ऊर्जामन्त्री श्रेष्ठसँगको भेटमा विद्युत् व्यापार विस्तार, जलविद्युत् आयोजना निर्माण, विपद् प्रतिकार्य र पूर्वसूचना प्रणालीबारे छलफल भयो । मन्त्री श्रेष्ठले पछिल्ला विपद्मा भारतले गरेको सहयोगप्रति धन्यवाद दिँदै सञ्चालित परियोजना छिटो सम्पन्न गर्न र निजी लगानी बढाउन आग्रह गरे ।
अर्थमन्त्री वाग्लेसँग आर्थिक साझेदारी सुदृढ बनाउने विषयमा कुरा भयो भने पूर्वाधारमन्त्री लाम्सालसँग कनेक्टिभिटीसहितको सहकार्यबारे छलफल भयो । परराष्ट्रमन्त्री खनालसँगको भेटमा ऊर्जा, उड्डयन, व्यापार, खेलकुद र शिक्षाका विषय उठेका थिए ।
प्रधानमन्त्री शाह मंसिरको तेस्रो सातासम्म भारत भ्रमणमा जाने तयारी छ । उक्त भ्रमणमा ऊर्जा व्यापार, जलविद्युत्, पूर्वाधार, कनेक्टिभिटी, आर्थिक साझेदारी र विपद्पछिको पुनर्निर्माण प्रमुख एजेन्डा बन्ने देखिएको छ ।
