ट्युनिस । उत्तर अफ्रिकी मुलुक ट्युनिसियामा अशान्ति फैलिएको छ । राजधानी ट्युनिससहित मुलुकका विभिन्न सहरमा बिहीबार प्रहरी र प्रदर्शनकारीबीच झडप भयो । हिरासतमा रहेका व्यक्तिको मृत्यु र सार्वजनिक सेवा कमजोर भएको भन्दै नागरिक सडकमा उत्रिएका हुन् ।राजधानीको एत्ताधामेन उपनगरमा लागुऔषध कारोबारको शङ्कामा समातिएका एक पुरुषको मृत्यु भएपछि स्थिति बिग्रिएको हो । ती व्यक्तिको परिवारले प्रहरी हिरासतमा कुटपिटबाट ज्यान गएको दाबी गर्दै छानबिन र दोषीमाथि कारबाही मागेका छन् । स्थानीय सञ्चारमाध्यमले भने उनले लागुऔषध निलेको कारण मृत्यु भएको उल्लेख गरेका छन् । प्रहरीले भीड तितरबितर पार्न अश्रुग्यास प्रयोग गर्‍यो भने प्रदर्शनकारीले सडक बन्द गरी टायर बाल्नुका साथै प्रहरीमाथि ढुङ्गा प्रहार गरे ।यस्तै, साफाक्स प्रान्तको जेबिनियानामा सुरक्षाकर्मीले पीछा गर्दा एक व्यक्तिको ज्यान गएको भन्दै प्रदर्शन भयो । त्यहाँ पनि प्रदर्शनकारीले गाडीमा आगो लगाए र टायर जलाए । एम्बुलेन्स ढिलो पुगेर मुटु रोगी एक छात्राको मृत्यु भएको भन्दै विद्यार्थीले अलग्गै विरोध गरे ।ट्युनिसियामा आर्थिक, सामाजिक र राजनीतिक सङ्कट बढ्दै जाँदा जनआक्रोश चुलिएको छ । गत शनिबार राजधानीमा राष्ट्रपति कैस सइदविरुद्ध वर्षौँपछिकै ठूलो प्रदर्शन भएको थियो भने बुधबार सैन्य अदालतले विपक्षी नेतृ ओल्फा हम्दीलाई चार वर्षको जेल सजाय सुनाएको छ ।