यमनमा द्वन्द्व चर्किरहेका बेला साउदी अरबका नागरिक लक्ष्यमा हुथी विद्रोहीहरूले गरेको आक्रमणप्रति संयुक्त राष्ट्रसङ्घले गम्भीर चिन्ता व्यक्त गरेको छ। महासचिव एन्टोनियो गुटेरेसले संयम अपनाउँदै यमनका लागि राजनीतिक समाधानको बाटो अपनाउन सबै पक्षलाई आह्वान गरेका छन्।
सामाजिक सञ्जाल एक्समार्फत उनले साउदीका नागरिक लक्ष्यमा भएका हुथी आक्रमण अस्वीकार्य रहेको बताएका छन्। यस्ता गतिविधिले सर्वसाधारणलाई दुःख दिने र क्षेत्रीय तनाव झन् बढाउने उनको टिप्पणी छ।
यसैबीच हुथी आन्दोलनलाई युरोपेली सङ्घ (इयु) को आतङ्कवादी सङ्गठनको सूचीमा राख्न आग्रह गर्ने युरोपेली संसद्को प्रस्तावलाई यमनको विदेश मन्त्रालयले स्वागत गरेको छ। मन्त्रालयका अनुसार यो कदमले नागरिकको सुरक्षा, क्षेत्रीय स्थायित्व र अन्तर्राष्ट्रिय जलमार्गको सुरक्षित आवागमन सुनिश्चित गर्न सघाउनेछ।
बिहीबार पारित प्रस्तावमा युरोपेली संसद्ले हुथी आक्रमणहरूलाई अन्तर्राष्ट्रिय र मानवीय कानुनको उल्लङ्घन भन्दै त्यसबाट यमनी नागरिकको मृत्यु तथा विस्थापन बढेको र मानवीय सङ्कट गहिरिएको उल्लेख गरेको छ। संसद्ले इजरायल र संयुक्त अरब इमिरेट्समाथि भएका क्षेप्यास्त्र तथा ड्रोन आक्रमणको पनि निन्दा गरेको छ।
इयुकी विदेश मामिला तथा सुरक्षा नीतिकी उच्च प्रतिनिधि काजा कल्लासको प्रस्तावपछि संसद्ले आन्दोलनका राजनीतिक तथा सैन्य शाखा, नेतृत्व र सुरक्षा संरचनालाई आतङ्कवादी सूचीमा राख्न आग्रह गरेको हो। आन्दोलनका आर्थिक स्रोत रोक्ने र सहयोग गर्ने पक्षका कोष तथा सम्पत्ति रोक्का गर्नसमेत आह्वान गरिएको छ।
यता इराकले साउदी अरबमाथिका आक्रमणको निन्दा गर्दै आफ्नो भूभाग कुनै पनि पक्षले आक्रमणका लागि प्रयोग गर्न नपाउने स्पष्ट पारेको छ। अल जजिराका अनुसार इराकका विदेशमन्त्री फुआद हुसेनले साउदी विदेशमन्त्री राजकुमार फैसल बिन फरहान अल साउदसँग टेलिफोन वार्ता गरी आक्रमण र त्यसबाट नागरिक तथा सार्वजनिक पूर्वाधारमा पुगेको क्षतिको निन्दा गरेका छन्।
