तिहार नजिकिएसँगै म्याग्दीको बेनी बजारमा परम्परागत परिकार झिनिया रोटीको कारोबार बढेको छ। चाडपर्वको माग धान्न बेनी नगरपालिका–७ मङ्गलाघाटका उद्यमीहरू घरपरिवारका सदस्य र श्रमिक परिचालन गरेर उत्पादनमा जुटेका छन्।
मङ्गलाघाटकी कल्पना श्रेष्ठले एक जना श्रमिक राखेर झिनिया बनाइरहेकी छन्। छोराछोरी विदेशमा रहेकाले चाडपर्वका बेला उनी श्रीमान्सँग मिलेर उत्पादन गर्छिन्। उनका अनुसार दशैँ–तिहारमा तीनदेखि चार लाख रुपैयाँसम्मको झिनिया बिक्री हुन्छ। बेनी बजारसँगै म्याग्दीका ग्रामीण भेग, पर्वत, बागलुङ र पोखरासम्म उनको उत्पादन पुग्छ।
सोही ठाउँका हेमबहादुर पुनको परिवारमा १० जना सदस्य दैनिक उत्पादनमा लागेका छन्। दैनिक एक बोरा चामलको पिठो बराबरको झिनिया तयार हुने गरेको उनी बताउँछन्। पछिल्ला दुई महिनादेखि परिवारका सबै सदस्य उत्पादनमा खटिएका छन् र चाडपर्वमा दुईदेखि तीन लाख रुपैयाँसम्मको बिक्री हुने उनको भनाइ छ।
झिनियालाई झिलिङ्गा रोटी पनि भनिन्छ। चामलको पिठो पकाएर मेसिनबाट चाउचाउजस्ता त्यान्द्रा निकालिन्छ र दुई दिन घाममा सुकाएपछि तयार हुन्छ। घिउ वा तेलमा तारेर खान सकिने झिनिया १२ वटाको १४० देखि १५० रुपैयाँसम्ममा बिक्री हुन्छ। तीन जनाले एक दिनमा ३५० भन्दा बढी झिनिया बनाउन सक्छन्।
बेनी–७ की टकसरा रानाले २५ वर्षदेखि झिनिया बनाउँदै आएकी छन्। उनका अनुसार विदेशबाट पनि माग आउँछ; दुई वर्षअघि अस्ट्रेलियाबाट २५ हजार रुपैयाँ बराबरको माग आए पनि उत्पादन नपुगेर १३ हजार रुपैयाँ बराबरको मात्रै पठाउन सकिन्। मङ्गलाघाटमा मात्रै २० जना झिनिया उद्यमी रहेको म्याग्दी उद्योग वाणिज्य सङ्घका निवर्तमान अध्यक्ष बेलबहादुर कटुवालले बताए।
