झापा । पूर्वी नाका काँकडभिट्टा हुँदै भारततर्फ हुने नेपाली चियाको निर्यात उल्लेख्य रूपमा बढेको छ। चालु आर्थिक वर्ष २०८३–८४ को असोज महिनामा गत वर्षको सोही अवधिको तुलनामा चिया निर्यातको परिमाण झण्डै दोब्बर पुगेको मेची भन्सार कार्यालयको तथ्याङ्कले देखाएको छ।
कार्यालयका अनुसार चालु आवको असोजमा ४९ करोड ५४ लाख ५२ हजार रुपैयाँ बराबरको १७ लाख १५ हजार ९३२ केजी चिया निर्यात भएको छ। गत आव २०८२–८३ को असोजमा भने २४ करोड ७४ लाख नौ हजार रुपैयाँ बराबरको नौ लाख दुई हजार ४४५ केजी चिया मात्र निर्यात भएको थियो।
एक वर्षको अवधिमा चिया निर्यातको परिमाण ९० प्रतिशतभन्दा बढीले बढेको छ भने निर्यातबाट प्राप्त आम्दानी पनि करिब दोब्बर भएको छ। चिया निर्यातमा आएको यो वृद्धिले पूर्वी पहाडी क्षेत्रका चिया उत्पादक र व्यवसायीलाई उत्साह थपेको छ।
काँकडभिट्टा नाकाबाट चियासँगै अलैँची र प्लाइउडको निर्यात पनि उल्लेख्य छ। गत असोजमा ९८ करोड ८८ लाख ८४ हजार रुपैयाँ बराबरको अलैँची र ४४ करोड २३ लाख ४८ हजार रुपैयाँ बराबरको प्लाइउड निर्यात भएको भन्सार कार्यालयले जनाएको छ।
इलाम, पाँचथर, ताप्लेजुङ र झापामा उत्पादित चिया काँकडभिट्टा नाका हुँदै मुख्यतः भारतीय बजारमा पुग्ने गरेको छ।
