भोजपुरको पौवादुङमा गाउँपालिकामा पर्ने पञ्चकन्या कृषि सडकको एक खण्ड कालोपत्र गरिएको छ। तिवारीभञ्याङदेखि गाउँपालिका केन्द्र च्याङ्गेसम्मको करिब दुई किलोमिटर सडक कालोपत्र सम्पन्न भएपछि स्थानीय बासिन्दाले वर्षायामको हिलो र हिउँदको धुलोबाट राहत पाएका छन्।
यो सडक मध्यपहाडी लोकमार्गको भोजपुर–लेगुवा खण्डसँग जोडिएको छ। तिवारीभञ्याङदेखि अँधेरीघाटसम्मको कुल ३१ किलोमिटर सडकमध्ये हाल च्याङ्गेसम्मको भाग मात्र कालोपत्र भएको गाउँपालिका उपाध्यक्ष ज्योत्सना राईले जानकारी दिइन्।
गाउँपालिका अध्यक्ष किरण राईका अनुसार आगामी दिनमा अँधेरीघाटसम्मकै सडक कालोपत्र गर्ने लक्ष्य राखिएको छ। यो सडक पौवादुङमा गाउँपालिकाको गौरवको आयोजनाका रूपमा अघि बढाइएको हो।
सडक कालोपत्र भएपछि कृषि उत्पादनको बजारीकरणमा सहजता आउने, स्थानीयको आवतजावत सरल हुने र क्षेत्रको आर्थिक गतिविधिमा टेवा पुग्ने अपेक्षा गरिएको छ। गाउँपालिकाले सडकलाई कृषि र पर्यटनसँग जोडेर अघि बढाउने योजना बनाएको छ।
