उदयपुरको चौदण्डीगढी नगरपालिका–८ बिरेन्द्रबजारदेखि त्रियुगा नगरपालिका–१४ धाप्लाङ जोड्ने सडक कालोपत्रे हुने भएको छ। बिरेन्द्रबजारबाट बोपुङ, कम्पुघाट र बाजगरा हुँदै धाप्लाङ पुग्ने यो सडकले उदयपुरको पुरानो बजार बेल्टार क्षेत्रलाई खोटाङ जिल्लासँग सिधा सडक सञ्जालमा जोड्नेछ।
सडक निर्माणका लागि चालु आर्थिक वर्षमा तीन करोड रुपैयाँ विनियोजन गरिएको छ। बेल्टार बसाहा उद्योग वाणिज्य संघले संघीय सांसद पारसमणि गेलालमार्फत सडक निर्माणको माग अघि सारेको थियो र सोही मागका आधारमा निर्माण प्रक्रिया अगाडि बढाइएको सांसद गेलालले बताए।
निर्माणको तयारीका क्रममा सांसद गेलालसहित पूर्वाधार सुपरिवेक्षण तथा अनुगमन कार्यालय इटहरीका प्रमुख प्रकाश चौधरी, सूचना अधिकारी धिर फडेरा र इन्जिनियर दीपेन्द्रकुमार शाह, उद्योग वाणिज्य संघका अध्यक्ष गोविन्द थापा, महासचिव अनिल पौडेल तथा चौदण्डीगढी नगरपालिकाका पूर्व नगर प्रमुख खगेन्द्र राई रहेको टोलीले सडकको स्थलगत अवलोकन गरेको छ।
सडकको विस्तृत परियोजना प्रतिवेदन तयार गर्ने र ठेक्का प्रक्रिया अगाडि बढाउने काम हुने कार्यालयले जनाएको छ। सडकलाई बहुवर्षीय योजनामा रूपान्तरण गरी निर्माण निरन्तर गर्ने तयारी छ। कालोपत्रे भएपछि बिरेन्द्रबजार हुँदै धाप्लाङसम्मको यातायात सहज हुने र उदयपुर–खोटाङबीचको आवागमनमा थप सुविधा पुग्ने अपेक्षा गरिएको छ।
