नेपाल प्रिमियर लिगको टोली जनकपुर बोल्ट्सका समर्थकले क्रिकेटलाई सामाजिक परिवर्तनको साधन बनाउने नयाँ अभियान थालेका छन्। समर्थक समूह ‘बोल्ट्स बटालियन’ले महिनावारी स्वच्छता र सचेतनाका लागि ‘डट फर डिग्निटी’ अभियान सुरु गरेको हो।
यस अभियानमा बोल्ट्सका बलरले फाल्ने प्रत्येक डट बल बराबर मधेशका ग्रामीण क्षेत्रका महिलालाई एक थान सेनेटरी प्याड दिइनेछ। प्याड वितरणसँगै गाउँगाउँमा महिनावारीसम्बन्धी सचेतना कार्यक्रम पनि सञ्चालन गरिने बटालियनका प्रतिनिधि जयकृष्ण महतोले बताए।
महिनावारी र सेनेटरी प्याडबारे समाजमा अझै खुलेर कुरा गर्न अप्ठेरो मानिने भएकाले त्यो धारणा बदल्न अभियानले सघाउने आयोजकको विश्वास छ। कतिपय किशोरी तथा महिलाले प्याड बोक्नसमेत लाज मान्ने अवस्था रहेको उल्लेख गर्दै बटालियनका अशोक अधिकारीले महिनावारीलाई लज्जाको विषय नभई स्वाभाविक प्रक्रिया र सम्मानसँग जोडिएको विषयका रूपमा स्थापित गर्न खोजिएको बताए।
बटालियनले एनपीएलका पहिलो र दोस्रो सिजनमा रंगशाला सरसफाइ अभियान पनि चलाएको थियो। यस वर्ष उक्त अभियानलाई निरन्तरता दिँदै सामाजिक सचेतनाको यो नयाँ अभियान थपिएको हो।
