काठमाडौं — देशका तीन फरक जिल्लामा प्रहरीले लागूऔषधसहित चार जनालाई नियन्त्रणमा लिएको छ। मकवानपुर, बाँके र धनुषामा भएका छुट्टाछुट्टै कारबाहीमा ठूलो परिमाणमा गाँजा र ब्राउनसुगरजस्तो पदार्थ बरामद भएको नेपाल प्रहरीको केन्द्रीय समाचार कक्षले जानकारी दिएको छ।
मकवानपुरको हेटौंडा उपमहानगरपालिका–१५ को पिपलबोटमा मंगलबार दिउँसो गरिएको जाँचका क्रममा ४२ किलो ४१० ग्राम गाँजा फेला परेको हो। रातोमाटे प्रहरी चौकीबाट खटिएको टोलीले हेटौंडाबाट बारातर्फ गइरहेको बीआर १ एपि ६०७३ नम्बरको गाडी रोकेर जाँच गर्दा १९ वटा पोकामा राखिएको गाँजा भेटिएको थियो। गाडीका चालक २५ वर्षीय बिर्जु कुमार राय र सवार २६ वर्षीय मन्जय कुमार रायलाई प्रहरीले पक्राउ गरेको छ। दुवै जना भारतको बैसाली महुवा टोलका बासिन्दा हुन्।
बाँकेको बैजनाथ गाउँपालिका–५ मा मंगलबार बिहान ३५० मिलिग्राम ब्राउनसुगरजस्तो पदार्थसहित ३२ वर्षीय दुखराम थारू पक्राउ परेका छन्। इलाका प्रहरी कार्यालय कोहलपुरबाट खटिएको प्रहरीले उनलाई नियन्त्रणमा लिएको हो।
धनुषाको शहिदनगर नगरपालिका–१ को भगबन टोलमा ४० वर्षीया प्रमिला देवी मण्डलको घरमा तलासी लिँदा करिब २ किलो ४७० मिलिग्राम गाँजा फेला परेको छ। इलाका प्रहरी कार्यालय सबैलाबाट खटिएको टोलीले मंगलबार दिउँसो उनलाई पक्राउ गरेको हो। प्रहरीले सबै घटनाबारे थप अनुसन्धान भइरहेको जनाएको छ।
