मुम्बई । बलिउड अभिनेता तुषार कपुरलाई ज्यान मार्ने धम्की दिँदै पाँच करोड भारतीय रुपैयाँ मागिएको घटनामा प्रहरीले अनुसन्धान अघि बढाएको छ ।
फोन गर्ने व्यक्तिले आफू लरेन्स बिश्नोई समूहको सदस्य हुँ भन्दै ‘ह्यारी बक्सर’ नाम बताएका थिए । उनले अभिनेतालाई फोन गरेर धम्की दिँदै उक्त रकम मागेको भारतीय सञ्चारमाध्यम अमर उजालाले जनाएको छ ।
घटनापछि अभिनेता कपुरले मुम्बई प्रहरीमा उजुरी दिएका छन् । उजुरीका आधारमा प्रहरीले छानबिनको जिम्मा एन्टी एक्सटर्सन सेल र क्राइम ब्रान्चलाई दिएको छ ।
क्राइम ब्रान्चको प्राविधिक टोलीले धम्कीपूर्ण फोन कुराकानीको रेकर्डिङ विस्तृत रूपमा जाँच गरेको छ । जाँचका क्रममा प्रहरीले उक्त कुराकानीको आवाजलाई आफ्नो अभिलेखमा रहेको ह्यारी बक्सरको आधिकारिक आवाज नमुनासँग तुलना गरेर हेरेको थियो ।
वरिष्ठ प्रहरी अधिकारीहरूका अनुसार दुवै आवाज नमिलेपछि उक्त फोन कल नक्कली भएको आशंका गरिएको छ । कसैले त्रास फैलाउने उद्देश्यले बिश्नोई समूहको नाम दुरुपयोग गरेको हुन सक्ने प्रहरीको भनाइ छ । घटनाबारे थप अनुसन्धान भइरहेको छ ।
