धनगढी — दशैँको अवधिमा सुदूरपश्चिम प्रदेशमा सवारी दुर्घटनाको संख्या उल्लेख्य रूपमा बढेको छ। घटस्थापनादेखि शुक्रबारसम्मको अवधिमा प्रदेशभर एक सय ५२ वटा सवारी दुर्घटना भएका छन्। ती घटनामा छ जनाले ज्यान गुमाएका छन् भने दुई सय ४३ जना घाइते भएका छन्। यो तथ्यांक सुदूरपश्चिम प्रदेश ट्राफिक प्रहरी कार्यालय अत्तरियाले सार्वजनिक गरेको हो।
जिल्लागत विवरणमा सबैभन्दा बढी दुर्घटना कैलालीमा भएको छ। त्यहाँ ८८ दुर्घटनामा चार जनाको मृत्यु भएको छ र एक सय ४६ जना घाइते भएका छन्। कञ्चनपुरमा ३५ दुर्घटनामा दुई जनाको मृत्यु हुँदा ५० जना घाइते भएका छन्। यी दुई जिल्लाबाहेक अन्य जिल्लामा दुर्घटनामा कसैको मृत्यु भएको छैन।
डडेल्धुरामा १०, डोटीमा आठ, अछाममा पाँच, दार्चुला र बाजुरामा दुई–दुई तथा बझाङ र बैतडीमा एक–एक दुर्घटना भएका छन्। ती जिल्लाका दुर्घटनामा ४७ जना घाइते भएका छन्।
गत वर्ष दशैँदेखि छठसम्मको अवधिमा प्रदेशभर एक सय २२ दुर्घटना भएका थिए। त्यसमा २३ जनाको मृत्यु भएको थियो र दुई सय ५३ जना घाइते भएका थिए। यस वर्ष दशैँमै दुर्घटनाको संख्या त्योभन्दा बढी पुगेको छ, यद्यपि मृत्यु हुनेको संख्या भने घटेको छ। चाडपर्वमा दुर्घटना नियन्त्रण गर्नु अझै चुनौतीपूर्ण रहेको प्रहरीको निष्कर्ष छ, तर मृतक संख्या घट्नुलाई सकारात्मक संकेत मानिएको छ।
