धनुषाको नगराइन नगरपालिका–७ देवडिहाका सात वर्षीय साकेत झा दश दिनपछि मृत अवस्थामा फेला परेका छन्। दशैँको टीकाका दिन घरबाट निस्किएपछि उनी बेपत्ता भएका थिए।
शनिबार घरबाट करिब पाँच किलोमिटर उत्तरतर्फ रहेको धानखेतमा उनको शव भेटिएको हो। घरपरिवार, गाउँले र प्रहरीले निरन्तर खोजी गरे पनि साकेतलाई जीवित भेट्ने आशा अन्ततः निराशामा परिणत भयो।
धनुषाका प्रहरी प्रवक्ता डीएसपी ओमप्रकाश खनालका अनुसार शव फेला परेपछि प्रहरी टोली घटनास्थल पुगेर अनुसन्धान थालेको छ। प्रारम्भिक अवस्थामा शव डिसकम्पोजको अवस्थामा रहेको उनले बताए।
बालक बेपत्ता भएपछि परिवारले खोजीका लागि हारगुहार गरेका थिए भने सामाजिक सञ्जालमार्फत सर्वसाधारणसँग सहयोगको अपिलसमेत गरिएको थियो। खोजी देवडिहा गाउँमा मात्र सीमित नभई नेपालका विभिन्न स्थान र भारतको बिहारसँग जोडिएका सहरहरूमा समेत गरिएको थियो। प्रहरी र स्थानीयले आसपासका गाउँ, पोखरी, झाडी तथा सम्भावित स्थानहरूमा खोजीलाई तीव्रता दिएका थिए।
