आम जनता पार्टीका अध्यक्ष प्रभु साहले पत्रकारमाथि भएको धरपकडको कडा निन्दा गरेका छन्। शनिबार भैरहवामा आयोजित अग्रगामी मोर्चाको कार्यक्रमलाई सम्बोधन गर्दै उनले सञ्चारगृहमा सादा पोशाकमा प्रहरी पठाएर राज्यले आतंक सिर्जना गरेको आरोप लगाए।
साहले पत्रकारहरूमाथि भएको धरपकडले राष्ट्रिय स्वतन्त्र पार्टीभित्रको घरझगडा उदांगो भएको बताए। पत्रकार पक्राउ गरिएको घटनाबारे प्रधानमन्त्रीलाई जानकारी नभएको भनिएकोप्रति उनले प्रश्न उठाए। त्यसोभए देश कसले चलाएको छ त भन्दै उनले सरकारको जवाफदेहितामाथि प्रश्न गरे।
प्रधानमन्त्रीमा बालेन्द्र शाह रहेको उल्लेख गर्दै उनले प्रधानमन्त्रीलाई थाहा नहुने तर राज्यमा आतंक मच्चाइएको अवस्थामा यसको जानकारी कसलाई छ भनी प्रश्न गरे। यो थाहा रवि लामिछानेलाई हो कि कसलाई हो भन्दै उनले घटनाको जिम्मेवारी कसले लिने भन्ने प्रश्न उठाए।
