दसैँको लामो बिदामा अस्पतालहरूले बहिरङ्ग सेवा बन्द गर्ने भए पनि आकस्मिक उपचार कक्ष चौबीसै घण्टा खुला रहनेछ । असोज ३१ गते फूलपातीदेखि द्वादशीसम्म सार्वजनिक बिदा छ भने शनिबार र आइतबार पनि जोडिएकाले बहिरङ्ग (ओपीडी) सेवा ८ दिनसम्म बन्द रहनेछ ।
स्वास्थ्य मन्त्रालयका प्रवक्ता डा. समीरकुमार अधिकारीका अनुसार सार्वजनिक बिदामा ओपीडी सेवा सामान्यतया सञ्चालन हुँदैन । तर आकस्मिक सेवा, सघन उपचार कक्ष (आईसीयू), डायलाइसिस र भर्ना भएका बिरामीको हेरचाह निरन्तर सञ्चालन गर्न संघीय अस्पताल तथा सातै प्रदेशका स्वास्थ्य निर्देशनालयलाई निर्देशन दिइसकिएको छ ।
प्रवक्ता अधिकारीले दसैँको बहानामा बिरामीको उपचार रोक्ने अस्पताललाई कारबाही हुने चेतावनी दिएका छन् । अस्पतालको आन्तरिक व्यवस्थाअनुसार केही अस्पतालले बिदामा पनि ओपीडी सेवा सञ्चालन गर्न सक्नेछन् ।
वीर अस्पतालले ओपीडी र नियमित शल्यक्रिया (रुटिन ओटी) मात्र बन्द गरी आकस्मिक, आईसीयू, डायलाइसिसलगायतका सेवा नियमित सञ्चालन गर्नेछ । अस्पतालका निर्देशक डा. विकास नेपालका अनुसार बिरामीको चाप कम हुने सर्जरी, नाक–कान–घाँटी (ईएनटी), कार्डियोभास्कुलर र ग्यास्ट्रो सर्जरीका वार्ड मर्ज गरेर सीमित जनशक्तिबाट सेवा दिइनेछ ।
कान्ति बाल अस्पतालका निर्देशक डा. रामहरि चापागाईंका अनुसार ओपीडी बन्द भए पनि आकस्मिक, अन्तरङ्ग, शल्यक्रिया र आईसीयू सेवा नियमित सञ्चालन हुनेछ । आकस्मिक कक्षमा हरेक दिन विशेषज्ञ चिकित्सकलाई पालो मिलाएर खटाइनेछ ।
दसैँमा सडक दुर्घटना र खानपानजन्य समस्याको जोखिमलाई ध्यानमा राख्दै एम्बुलेन्स सेवा पनि तयार अवस्थामा राखिएको छ । एकीकृत प्रणालीमार्फत १०२ नम्बरबाट सम्पर्क गरी एम्बुलेन्स सेवा लिन सकिनेछ ।
