काठमाडौँ । चिकित्सकको सिफारिसबिना खरिद गर्न नपाइने ठूलो परिमाणको औषधिसहित दुईजना युवक पक्राउ परेका छन् । इलाका प्रहरी कार्यालय फर्पिङका अनुसार दक्षिणकाली नगरपालिका–५ स्थित फर्पिङ बसपार्कबाट वीरगञ्जबाट काठमाडौँ आइरहेको कार जाँच गर्दा ७२ हजार ८० थान ट्रामाडोल क्याप्सुल बरामद गरिएको हो ।
पक्राउ पर्नेहरूमा बाराको कलैया उपमहानगरपालिका–२३ कोयरियाका २७ वर्षीय सुदिप पटेल र वीरगञ्ज महानगरपालिका–१७ अलौका २७ वर्षीय सुनिल सहनी छन् । उनीहरू चढेको कार फर्पिङ बसपार्कमा रोकिएको बेला प्रहरीले जाँच गर्दा क्याप्सुल फेला परेको थियो ।
ट्रामाडोल चिकित्सकको सिफारिसमा मात्र बिक्री–वितरण गर्न पाइने औषधि हो । यति ठूलो परिमाणमा अनधिकृत रूपमा ओसारपसार गरिरहेको अवस्थामा फेला परेपछि उनीहरूलाई नियन्त्रणमा लिइएको प्रहरीले जनाएको छ । घटनाबारे थप अनुसन्धान भइरहेको छ ।
