बर्दिया । गाउँघरमा जमरा राखिएका छन्, कुलदेवताको पूजा भइरहेको छ र बस्तीमा दसैँको रौनक छ । तर राजापुर नगरपालिका–९ तिनघरवाका पाँच परिवारका लागि यसपटकको दसैँ खुसीको चाड बन्न सकेको छैन ।
परिवारको भविष्य बनाउने सपना बोकेर रोजगारीका लागि रसुवा पुगेका आफन्त भोटेकोशी बाढीमा बेपत्ता भएपछि ती परिवारमा खुसीभन्दा बढी पीडा छ । घरमा जमरा राखे पनि श्रीमान् बेपत्ता हुँदाको पीडाले सिर्जना थारुलाई पर्व मनाउने जाँगर छैन । ‘दसैँ आएको छ, तर परिवारमा कुनै खुसी छैन,’ आँखाभरि आँसु पार्दै उनले भनिन् ।
बेपत्ता सुरेश थारुकी श्रीमती रमिता थारु श्रीमान् फर्किने आशामा दिनरात बिताइरहेकी छन् । ‘उनलाई सम्झेर दसैँ कसरी मनाउने ?’ उनले भनिन् । घरमा जमरा राखेर कुलदेवताको पूजा गरे पनि दुःखका कारण टीका नलगाई दसैँ बिताउने उनले बताइन् ।
एउटै टोलका सुरेश थारु, अमिस थारु, सिसन थारु, प्रदीप थारु र राजु थारु गत भदौ १० गते भोटेकोशी बाढीमा परेर बेपत्ता भएका थिए । पाँच जना बेपत्ता भएपछि पीडा परिवारमा मात्र सीमित छैन, सिङ्गो गाउँ नै शोकमा छ । बेपत्ता राजुका दाइ तुलाराम थारुका अनुसार विपत्तिले गाउँका सबैलाई दुःखी बनाएको छ ।
राजापुर नगरपालिका–९ तिनघरवा गाउँमा ७५ परिवार बसोबास गर्छन् । विगतमा रोजगारी र अध्ययनका लागि सहरबजार गएकाहरू दसैँ मनाउन गाउँ फर्किँदा बस्तीमा चहलपहल हुन्थ्यो । तर यस वर्ष बाढीको पीडाले गाउँको माहोल बदलिएको छ । गाउँका बरघर बरुण थारुका अनुसार यस वर्ष गाउँमा दसैँको रौनक छैन । यसअघि अटवारी र तीज पनि उल्लासपूर्वक मनाउन नसकिएको स्थानीयले बताएका छन् ।
बाढीमा बेपत्ता मजदुरका परिवारले अहिलेसम्म सरकारी राहत पाएका छैनन् । काजकिरिया गर्न खर्च अभाव भएको उनीहरूको गुनासो छ । विपद् सम्पर्क व्यक्ति खुसीराम थारुका अनुसार बेपत्ता भएकाहरूलाई सरकारले मृत घोषणा नगरेकाले काजकिरियाका लागि राहत दिन समस्या भएको हो । मृत घोषणा गरिएमा स्थानीय सरकारले रु ५० हजारसम्म सहयोग गर्न सक्ने उनले बताए । बेपत्ता राजुका दाइ तुलारामले कामको ज्यालासमेत नपाएको गुनासो गर्नुभयो । भोटेकोशी बाढीमा राजापुर नगरपालिकाका ११ जनासहित बर्दियाबाट ७६ जना बेपत्ता छन् ।
