पोखरा । नागरिकलाई घरदैलोमै आधारभूत स्वास्थ्य सेवा पुर्याउने घोषणासहित सङ्घीय सरकारले स्थानीय तहमा ५, १० र १५ शय्याका अस्पताल निर्माणको महत्त्वाकाङ्क्षी नीति अघि सारेको थियो । तर घोषणाका वर्षौं बितिसक्दा पोखरासँग जोडिएका कास्कीका चार गाउँपालिकामा अस्पतालको हालत अझै समस्याग्रस्त छ ।
अन्नपूर्ण गाउँपालिकाले नौडाँडामा १५ शय्याको भवन सम्पन्न गरेर २०८२ वैशाख १ गतेदेखि अस्पताल सञ्चालनमा ल्याएको छ । १८ करोडको लागत अनुमान रहेको भवन १३ करोडमा बनेको हो । तर २४ घण्टा सेवा दिन ३० जनाको दरबन्दी चाहिने अस्पतालमा हाल १३–१४ जना मात्र छन् । स्वास्थ्य संयोजक ऋषिराम पौडेलका अनुसार पूर्ण क्षमतामा चलाउन वार्षिक ४–५ करोड लाग्छ, जबकि पालिकाको कुल विकास बजेट नै १०–१२ करोड छ ।
रुपा गाउँपालिकाले कोभिडकालदेखि पुरानै संरचना स्तरोन्नति गरेर अस्पताल चलाइरहेको छ । २५ शय्याको स्वीकृति भए पनि हाल १५ शय्यामा सञ्चालन छ, जहाँ एमबिबिएस डाक्टर, निःशुल्क दन्त सेवा, माइनर अपरेसन र प्रसूति सेवा नियमित छ । पालिकाले वार्षिक ३५–४० लाख आन्तरिक स्रोतबाट खर्च गर्छ । अध्यक्ष नवराज ओझाले सम्पूर्ण आर्थिक भार स्थानीय तहमा मात्र थुपारिएको गुनासो गर्छन् ।
मादीको छाचोकमा निर्माणाधीन १५ शय्याको अस्पताल चरम ढिलासुस्तीको सिकार बनेको छ । २०७७ मा सम्झौता भएर २०८० भित्र सकिनुपर्ने भवनको भौतिक प्रगति मुस्किलले ३२ प्रतिशत छ । जग्गा लेआउट र डीपीआर नमिल्दा दुई वर्ष काम रोकियो र लागत १४ बाट १६ करोड पुगेको छ । २०८३ पुससम्म म्याद थपिए पनि काम सकिने छनक छैन ।
माछापुच्छ्रेमा भने भेडाबारी र चोरखोल्साबीचको ठाउँ विवाद नटुङ्गिएकाले अस्पताल निर्माण नै रोकिएको छ । पोखरा १२ किलोमिटर मात्र टाढा भएकाले ठूलो अस्पताल चलाउन नसकिने निष्कर्षमा पालिका पुगेको छ ।
