दाङमा जिप दुर्घटना हुँदा एक जनाको मृत्यु भएको छ भने छ जना घाइते भएका छन्। शुक्रबार बेलुकी घोराही उपमहानगरपालिका–१२ को साजखर्कबाट पश्चिम दाङको साशर खोलातर्फ जाँदै गरेको भे १ ज ६०४ नम्बरको जिप अनियन्त्रित भएर दुर्घटनामा परेको प्रहरीले जनाएको छ। जिप साजखर्कबाट छुटेर साशर खोलातर्फ जाँदै गर्दा बाटोमै अनियन्त्रित भएको प्रहरीको भनाइ छ।
दुर्घटनामा घोराही–१२ का ४० वर्षीय शेरमान घर्तीको मृत्यु भएको हो। उनलाई उपचारका लागि राप्ती स्वास्थ्य विज्ञान प्रतिष्ठान पुर्याइएको थियो, तर चिकित्सकले शुक्रबार बेलुकी नै मृत घोषणा गरेका थिए।
घाइते हुनेहरूमा घोराही–१२ का १३ वर्षीय उमेश बुढा, ६ वर्षीय विकास बुढा, २८ वर्षीय धनबहादुर घर्ती र २५ वर्षीय मानबहादुर बुढा रहेका छन्। त्यसैगरी तुलसीपुर उपमहानगरपालिका–१३ का ९ वर्षीय अनमोल पुन पनि घाइते भएका छन्। घाइते सबैको अवस्था सामान्य रहेको प्रहरीले जनाएको छ। उनीहरूको राप्ती स्वास्थ्य विज्ञान प्रतिष्ठानमा उपचार भइरहेको छ।
दुर्घटनापछि प्रहरीले जिपका चालक तथा धनी घोराही–१२ का ३७ वर्षीय धमन घर्ती मगरलाई नियन्त्रणमा लिएको छ।
