लण्डन । बेलायतका प्रधानमन्त्री एन्डी बर्नह्यामले ट्रान्सएट्लान्टिक दास व्यापारमा बेलायतले खेलेको भूमिकाका लागि औपचारिक माफी माग्न आफू तयार रहेको बताएका छन्। तर उनले क्षतिपूर्ति दिने माग भने स्पष्ट रूपमा अस्वीकार गरेका छन्।
लेबर पार्टीका नेता बर्नह्यामले एन्टिगुआ र बारबुडामा आयोजना हुने कमनवेल्थ नेताहरूको सम्मेलनअघि गार्जियन पत्रिकामा लेखेको लेखमार्फत यो धारणा सार्वजनिक गरेका हुन्। उनले लाखौँ मानिसले भोगेको पीडाप्रति आफ्नो दुःख र पश्चात्ताप व्यक्त गर्न चाहेको उल्लेख गर्दै दास व्यापारले आजको संसारलाई कसरी आकार दियो भन्ने कुरा स्वीकार गर्न चाहेको बताएका छन्।
बर्नह्यामका अनुसार ट्रान्सएट्लान्टिक दास व्यापार दास बनाइएका मानिसहरूको अधिकारमाथिको क्रूर र बर्बर आक्रमण थियो। उनले प्रभावित पक्षसँग संरचित संवाद गर्न आफ्नो सरकार इच्छुक रहेको र बेलायती राज्यका तर्फबाट औपचारिक माफीको माग सुन्नु त्यस प्रक्रियाको महत्त्वपूर्ण हिस्सा हुने बताएका छन्।
यसैबीच राजा चार्ल्स तृतीय क्यारिबियाली भ्रमणमा छन्। नोभेम्बर १ देखि ४ सम्म चल्ने कमनवेल्थ सम्मेलनलाई उनले सम्बोधन गर्नेछन्। मङ्गलबार बहामासमा राजाले दासप्रथालाई विगतको ठूलो पीडा मानिएको स्वीकार गरेका थिए। बेलायतले दासत्वका लागि अहिलेसम्म औपचारिक माफी मागेको छैन र क्षतिपूर्ति तिर्न पनि सहमत भएको छैन।
क्षतिपूर्तिबारे बर्नह्यामले फरक युग र फरक कानूनमा भएका अपराध जतिसुकै घृणित भए पनि आजका बेलायती जनतालाई त्यसका लागि जिम्मेवार बनाउन नसकिने तर्क गरेका छन्, किनभने उनीहरूको त्यसमा व्यक्तिगत भूमिका थिएन। बेलायतले शताब्दीयौँदेखि उपनिवेशवाद र दास व्यापारबाट फाइदा उठाएको थियो भने सन् १८३३ मा संसद्ले दासत्व उन्मूलन गर्ने कानून पारित गरेको थियो।
