धनकुटा जिल्ला अस्पतालमा सञ्चालन भएको नि:शुल्क शल्यक्रिया शिविरले आर्थिक कठिनाइका कारण उपचारबाट टाढा रहेका सयौँ बिरामीलाई राहत दिएको छ। कात्तिक ९ गतेदेखि सुरु भएको शिविरमा हालसम्म ९७२ जनाले शल्यक्रिया तथा अन्य स्वास्थ्य सेवा पाएका छन्। अमेरिकाको हवाईस्थित अलोहा मेडिकल मिसनको प्राविधिक सहयोगमा सञ्चालन भएको शिविरमा १ हजार १७ जनाले नाम दर्ता गराएका थिए।
शिविरमा ७६ जनाको जटिल र ४ सय ५३ जनाको सामान्य शल्यक्रिया भएको छ। हर्निया, हाइड्रोसिल, पित्तथैलीको पत्थरी, पाठेघर खस्ने समस्या र फिस्टुलालगायत रोगका बिरामीको उपचार गरिएको छ। त्यस्तै गाँठागुठी भएका २ सय २८, पायल्सबाट पीडित १ सय ७८ र नाक, कान तथा घाँटीको समस्या भएका ४७ जनाले पनि सेवा पाएका छन्।
शिविरमा ४ सय ४१ जनाले स्क्रिनिङ तथा अन्य उपचार सेवा लिएका छन् भने दुई जनालाई कृत्रिम हात प्रदान गरिएको छ। धनकुटाका साथै छिमेकी जिल्लाबाट आएका बिरामीले समेत शिविरबाट सेवा लिएका छन्।
आयोजकका अनुसार उपचार महँगो बन्दै गएको समयमा यस्ता शिविरले आर्थिक रूपमा कमजोर नागरिकलाई ठूलो सहयोग पुर्याउँछन्। सुरुमा सामान्य देखिने तर समयमै उपचार नपाउँदा जटिल बन्न सक्ने रोगको छिटो पहिचान र उपचार हुनु शिविरको प्रमुख उपलब्धि भएको शिविर सञ्चालन तथा व्यवस्थापन मूल समितिका संयोजक रोशेष श्रेष्ठले बताए।
