चीनको निजी अन्तरिक्ष कम्पनीले एकै उडानमा १८ वटा भू–उपग्रह अन्तरिक्षमा पुर्याएको छ। क्यास स्पेसले विकास गरेको किनेटिका–टु रकेट मंगलबार बिहान स्थानीय समयअनुसार ८ः१५ बजे उत्तरपश्चिम चीनको डोङफेङ व्यावसायिक अन्तरिक्ष परीक्षण क्षेत्रबाट उडेको थियो।
रकेटले चीनको छियानफान स्याटेलाइट इन्टरनेट परियोजनाका लागि तयार पारिएका १८ भू–उपग्रहलाई ध्रुवीय कक्षमा स्थापित गरेको छ। यो किनेटिका–टु को दोस्रो उडान हो, तर ठूलो संख्यामा भू–उपग्रह एकैपटक लैजाने उद्देश्यले गरिएको पहिलो अभियान भएको कम्पनीले जनाएको छ।
रकेट कार्यक्रमका प्रमुख डिजाइनर तथा कमान्डर याङ हाओलियाङका अनुसार चीनमा न्यून भू–कक्षीय स्याटेलाइट इन्टरनेट निर्माण अहिले तीव्र विस्तारको चरणमा छ। यस्तो अवस्थामा नियमित, भरपर्दो र कम लागतमा भू–उपग्रह प्रक्षेपण गर्ने क्षमता झनै आवश्यक भएको उनको भनाइ छ।
कम्पनीको दाबीअनुसार किनेटिका–टु चीनको पहिलो ‘युनिभर्सल बुस्टर कोर’ संरचनायुक्त रकेट हो। यसले ५०० किलोमिटर उचाइको कक्षमा आठ टन र २०० किलोमिटर उचाइको न्यून भू–कक्षमा १२ टनसम्मको भार पुर्याउन सक्छ। त्यसैले ठूलो संख्यामा भू–उपग्रह प्रक्षेपण गर्न र कम लागतमा अन्तरिक्षमा सामान ढुवानी गर्न यो उपयोगी हुने बताइएको छ।
गत मार्चमा किनेटिका–टु ले पहिलो उडानका क्रममा ‘छिङझाउ’ कार्गो अन्तरिक्षयानको नमुना कक्षमा पुर्याएको थियो। मंगलबारको उडान किनेटिका रकेट शृङ्खलाको १८औँ प्रक्षेपण हो। कम्पनीका अनुसार यस शृङ्खलाका रकेटले अहिलेसम्म एउटा अन्तरिक्षयान र १३९ वटा भू–उपग्रह अन्तरिक्षमा पुर्याइसकेका छन्, जसको कुल भार २७ टनभन्दा बढी छ।
सांघाई महानगर सरकारको आधिकारिक वेबसाइटमा अक्टोबर २८ मा प्रकाशित विवरणअनुसार छियानफान सञ्जालमा हालसम्म २५६ वटा न्यून भू–कक्षीय ब्रोडब्यान्ड भू–उपग्रह प्रक्षेपण भइसकेका छन्। सन् २०२६ को अन्त्यसम्म थप ६८ वटा प्रक्षेपण गरी कुल संख्या ३२४ पुर्याउने चीनको योजना छ। यसबाट स्याटेलाइट इन्टरनेट सेवाको व्यावसायिक सञ्चालनका लागि आधार तयार हुने अपेक्षा गरिएको छ।
