सर्वोच्च अदालतले प्रधानन्यायाधीश तथा अन्य न्यायाधीशबारे सञ्चारमाध्यममा आएका समाचारप्रति गम्भीर ध्यानाकर्षण भएको जनाएको छ। सोमबार बसेको सबै न्यायाधीश सम्मिलित फूलकोर्ट बैठकले यस विषयमा आफ्नो धारणा सार्वजनिक गरेको हो।
बैठकले संविधानको सर्वोच्चता र कानुनको शासनप्रति आफ्नो प्रतिबद्धता दोहोर्याएको छ। सार्वजनिक भएका विषयमा निष्पक्ष छानबिन गर्न सम्बन्धित निकायलाई आग्रह गरिएको छ।
सर्वोच्चका प्रवक्ता डा. अशोककुमार क्षेत्रीले जारी गरेको विज्ञप्तिमा पूर्वाग्रहरहित र स्वतन्त्र ढंगले अनुसन्धान गरी सत्यतथ्यसहितको निष्कर्ष यथाशीघ्र सार्वजनिक गर्न भनिएको छ। छानबिन र अनुसन्धानमा कानुनबमोजिम सहयोग तथा जवाफदेहिता निर्वाह गर्न न्यायपालिका प्रतिबद्ध रहेको बैठकले स्पष्ट पारेको छ।
छानबिनको निष्कर्ष नआउँदै कसैलाई लाञ्छित गर्ने वा न्याय सम्पादनमा अवरोध पुग्ने गरी समाचार प्रकाशन तथा प्रसारण नगर्न सञ्चारमाध्यमलाई पनि आग्रह गरिएको छ। न्यायपालिका जनताको आस्था र विश्वासमा आधारित संस्था भएकाले यससँग सम्बन्धित समाचारले सेवाग्राहीमा भ्रम र नकारात्मक असर पार्न नहुने बैठकको भनाइ छ।
बैठकले प्रकाशित समाचारबाट विचलित नभई नियमित न्यायिक काममा सक्रिय रहन देशभरका अदालतमा कार्यरत न्यायाधीश तथा कर्मचारीलाई आग्रह गरेको छ।
