नेपाल प्रिमियर लिग (एनपीएल) अन्तर्गत सोमबार भएको खेलमा कर्णाली याक्सले काठमाडौँ गोर्खाजसामु १८१ रनको लक्ष्य राखेको छ। कीर्तिपुरस्थित त्रिवि अन्तर्राष्ट्रिय क्रिकेट मैदानमा टस हारेर पहिला ब्याटिङ गरेको कर्णालीले निर्धारित २० ओभरमा ६ विकेट गुमाउँदै १८० रन बनायो।
कर्णालीका लागि आरिफुल इस्लामले उत्कृष्ट ब्याटिङ गरे। उनले २२ बल खेल्दै ३ छक्का र ५ चौकासहित ४४ रन जोडे। हुसेन तलतले ३० बलमा २ छक्का र १ चौकासहित ४० रन बनाए भने पवन सर्राफ २४ बलमा २ छक्कासहित २७ रनमा अविजित रहे।
गुलशन झाले १२ बलमा २ छक्कासहित २० रन बनाएर टोलीको योगफल उकास्न सहयोग गरे। काठमाडौँका कप्तान करण केसीले २ विकेट लिए। शहाब आलम, देव साह र सन्तोष यादवले समान १–१ विकेट हात पारे।
जवाफी ब्याटिङमा काठमाडौँले १८१ रनको लक्ष्य पूरा गर्नुपर्ने छ। काठमाडौँ कस्तो प्रदर्शन गर्छ भन्नेमा सबैको ध्यान रहने छ।
