काठमाडौं । राष्ट्रिय परिचयपत्रको विवरण प्रमाणीकरण हुन बाँकी रहेकै कारण नागरिकले सार्वजनिक सेवा पाउनबाट वञ्चित हुनु नपर्ने राष्ट्रिय परिचयपत्र तथा पञ्जीकरण विभागले स्पष्ट पारेको छ । राहदानी, बैंक तथा वित्तीय सेवा र सवारी चालक अनुमतिपत्रजस्ता सेवा नियमित रूपमा उपलब्ध हुने विभागले जनाएको छ ।
विभागले आज सूचना जारी गर्दै राष्ट्रिय परिचय नम्बर पाएका नागरिकको विवरण प्रमाणीकरण नभएको कारण देखाएर सेवा रोक्न नहुने सम्बन्धित निकायलाई आग्रह गरेको हो । प्रमाणीकरणमा समस्या देखिए पनि सेवाग्राहीलाई सेवा निरन्तर दिनुपर्ने विभागको भनाइ छ ।
विवरण दर्ता गर्ने र राष्ट्रिय परिचय नम्बर जारी गर्ने काम राष्ट्रिय परिचय व्यवस्थापन सूचना प्रणालीमार्फत नियमित रूपमा भइरहेको विभागले जनाएको छ । तर प्रमाणीकरणका लागि प्रयोग हुने स्वचालित बायोमेट्रिक सूचना प्रणाली (एबीआईएस) को क्षमताका कारण केही नागरिकको विवरण प्रमाणीकरणमा ढिलाइ भएको हो ।
यस्तो समस्या गत असोज १ गतेपछि विवरण दर्ता गराएर नम्बर प्राप्त गरेका नागरिकमा देखिएको विभागले बताएको छ । एबीआईएसको क्षमता बढाउने काम अन्तिम चरणमा पुगेको छ र आगामी दुई साताभित्र सकिने अपेक्षा विभागले गरेको छ । त्यसपछि प्रमाणीकरण सेवा सामान्य रूपमा चल्ने विभागको विश्वास छ ।
विभागले प्रणालीसँग जोडिएका सेवाप्रदायक निकायलाई यसबारे जानकारी गराइसकेको र समन्वय गरिरहेको जनाएको छ । पछिल्लो समय प्रमाणीकरणमा समस्या हुँदा विशेषगरी सवारी चालक अनुमतिपत्रको सेवा लिन नागरिकलाई असहज भएको गुनासो आएको थियो ।
