काठमाडौं । वर्षाले प्रभावित बनेको नेपाल प्रिमियर लिग (एनपीएल) को खेलमा विराटनगर किंग्सले सुदूरपश्चिम रोयल्समाथि शानदार जित निकालेको छ । कीर्तिपुरस्थित त्रिवि क्रिकेट मैदानमा शनिबार राति सम्पन्न छोटो भिडन्तमा विराटनगरले विस्फोटक ब्याटिङको बलमा खेल आफ्नो पक्षमा पारेको हो ।
साँझ ५ बजेका लागि तय गरिएको खेल वर्षा र भिजेको मैदानका कारण लामो समयसम्म सुरु हुन सकेन । अन्ततः खेल पाँच-पाँच ओभरमा छोट्याइयो र राति ९ बजे टस भएपछि ९:१५ बजे बलिङ सुरु भयो । सुदूरपश्चिमका कप्तान दीपेन्द्रसिंह ऐरीले टस जितेर पहिले बलिङ गर्ने निर्णय लिए ।
ब्याटिङमा उत्रिएको विराटनगरले निर्धारित पाँच ओभरमा दुई विकेट गुमाएर १०५ रन जोड्यो र सुदूरपश्चिमसामु १०६ रनको लक्ष्य राख्यो । ओपनर शेहान जयसूर्याले ११ बलमा दुई चौका र पाँच छक्कासहित ३९ रन बनाए । लोकेश बमले १० बलमा २५ रन जोड्दा आन्द्रे रसेल १० बलमा २९ रन बनाएर अविजित रहे ।
विराटनगरको सुरुआत निकै आक्रामक रह्यो । पहिलो ओभरमै जयसूर्याले सुदूरपश्चिमबाट एनपीएलमा डेब्यु गरेका श्रीलंकाली स्पिनर थरिन्दु रत्नायाकेलाई पाँच छक्का प्रहार गर्दै टोलीको खातामा ३५ रन थपे । जयसूर्या र बमले केवल आठ बलमै टोलीको अर्धशतक पूरा गराएका थिए । सुदूरपश्चिमका लागि अविनाश बोहराले दुई ओभरमा २८ रन खर्चेर दुई विकेट लिए ।
जवाफमा सुदूरपश्चिमले १०६ रनको लक्ष्य पूरा गर्न सकेन र विराटनगरले खेल जित्यो । यो विराटनगरको यस सिजनको तेस्रो खेल थियो । यसअघिका दुवै खेलमा पराजित भएको विराटनगरका लागि यो जित महत्वपूर्ण बनेको छ । सुदूरपश्चिम भने एक जित र एक हारसहित तेस्रो खेल खेल्दै थियो ।
