सरकारले युवालाई कृत्रिम बुद्धिमत्ता (एआई) को व्यावहारिक सीप सिकाउन निःशुल्क अनलाइन तालिम सञ्चालन गर्ने भएको छ। युवा, श्रम तथा रोजगार मन्त्रालयअन्तर्गतको राष्ट्रिय व्यावसायिक प्रशिक्षण प्रतिष्ठानले ‘एआईको प्रभावकारी प्रयोग तथा प्रम्प्ट लेखन’ शीर्षकमा तालिम आयोजना गर्न लागेको हो।
तालिम आगामी कात्तिक १८ र १९ गते हुनेछ। चार छुट्टाछुट्टै सत्र राखिएका छन् — बिहान १० देखि १२ बजेसम्म र बेलुका ६ देखि ८ बजेसम्म। प्रत्येक सहभागी कुनै एक सत्रमा मात्र सहभागी हुनेछन्। प्रति सत्र ५०० जनाका दरले जम्मा २ हजार युवाले अवसर पाउनेछन्।
तालिममा च्याटजीपीटी र क्लडजस्ता चर्चित एआई उपकरण चलाउने तरिका र प्रभावकारी प्रम्प्ट लेख्ने सीप सिकाइनेछ। एआईको सहयोगमा व्यावसायिक इमेल लेख्ने, टिपोट तयार गर्ने, बैठकका निर्णय लेख्ने र आकर्षक प्रस्तुतीकरण बनाउने अभ्यास पनि गराइनेछ। तस्बिर तथा छोटा भिडियो बनाउने, एआईलाई जिम्मेवारीपूर्वक प्रयोग गर्ने र एआईबाट प्राप्त जानकारी सही छ कि छैन भनेर जाँच्ने तरिका पनि सिकाइनेछ।
मन्त्रालयका अनुसार अध्ययन, रोजगारी र व्यावसायिक काममा एआईको सही प्रयोग गर्न युवालाई आवश्यक सीप दिनु तालिमको उद्देश्य हो। अनलाइन माध्यमबाट प्रत्यक्ष तालिम दिनु मन्त्रालयका लागि नयाँ अभ्यास हो। यसबाट प्राप्त अनुभवले आगामी दिनमा देशभरका धेरै युवासम्म यस्ता कार्यक्रम पुर्याउन सहयोग पुग्ने अपेक्षा छ।
युवा, श्रम तथा रोजगारमन्त्री रामजी यादवले एआईसम्बन्धी ज्ञान र सीप केही व्यक्तिमा मात्र सीमित हुन नहुने बताए। प्रविधिबाट सिर्जना हुने अवसर देशभरका सबै युवाको पहुँचमा पुग्नुपर्ने उनको भनाइ छ। आगामी दिनमा अनलाइन र भौतिक दुवै माध्यमबाट थप उन्नतस्तरका तालिम सञ्चालन गरेर देशभरका युवालाई एआईमा दक्ष बनाउने लक्ष्य रहेको उनले बताए।
इच्छुक युवाले अनलाइनमार्फत आवेदन दिन सक्नेछन्। छनोट भएका आवेदकलाई तालिम सुरु हुनुअघि नै कुन सत्रमा सहभागी हुने भन्ने जानकारी दिइने प्रतिष्ठानले जनाएको छ।
