काठमाडौँ । नेपाल प्रिमियर लिगअन्तर्गत शनिबार हुने भनिएको विराटनगर किङ्स र सुदूरपश्चिम रोयल्सबीचको खेल वर्षाका कारण प्रभावित भएपछि विराटनगरका कप्तान सन्दीप लामिछानेले आफ्नो टोली मैदानमा उत्रन पूर्ण रूपमा तयार रहेको बताएका छन् ।
खेल नहुनुको अन्तिम निर्णय आयोजक र खेलका पदाधिकारीहरूको हातमा रहेको उल्लेख गर्दै लामिछानेले खेलाडीको चाहना भने खेल हुनुपर्ने नै रहेको स्पष्ट पारे । ‘हाम्रा खेलाडीहरू तयार थिए, विदेशी खेलाडीहरू पनि खेल्न इच्छुक थिए । तर पदाधिकारीहरूले जे निर्णय गर्नुहुन्छ, हामी त्यसलाई स्वीकार गर्छौँ,’ उनले भने ।
कप्तान लामिछानेका अनुसार खेलाडी, आयोजक, मैदान तयार पार्ने कर्मचारी र दर्शक सबैले आ–आफ्नो ठाउँबाट ठूलो मेहनत गरेका छन्, त्यसैले सबैको परिश्रमको सम्मान हुनुपर्छ । दिउँसो पानी परेदेखि राति ११–१२ बजेसम्म रङ्गशालामा बसेर साथ दिएका दर्शकप्रति उनले विशेष आभार व्यक्त गरे ।
खेल पुनः तालिका गर्ने विषय खेलाडीहरूको उपलब्धतासँग पनि जोडिने उनको भनाइ छ । क्रिकेट खेल्नकै लागि मैदानमा आएको भन्दै अवस्था अनुकूल भए खेल हुनुपर्ने उनको चाहना रहेको उनले बताए ।
खेलको निर्णय वा त्यसबाट आउने नतिजालाई लिएर विवाद गर्नुभन्दा क्रिकेटलाई नै प्राथमिकता दिनुपर्नेमा लामिछानेले जोड दिए । नेपाली क्रिकेट र नेपाली माटोको सम्मान आफूहरूका लागि सबैभन्दा महत्वपूर्ण रहेको उल्लेख गर्दै उनले खेल भावनाको सम्मान गर्न आग्रह गरे । ‘हामी कर्ममा विश्वास गर्छौँ । भाग्यमा जे लेखिएको छ, त्यही हुन्छ । तर सबैभन्दा महत्वपूर्ण कुरा क्रिकेट हो,’ उनले भने ।
