युरोपका तीन शक्तिशाली अर्थतन्त्र भएका मुलुक फ्रान्स, इटाली र जर्मनीमा यतिबेला युवापुस्ता सडकमा उत्रिएको छ। दैनिक खर्च बढ्दै गएको, सार्वजनिक सेवा कमजोर बनेको र भविष्यप्रतिको अनिश्चितताले युवालाई आन्दोलित बनाएको छ। तीनै देशका प्रदर्शनमा सरकारप्रतिको असन्तुष्टि साझा भए पनि आन्दोलनको स्वरूप र तीव्रता भने फरक–फरक देखिएको छ।
फ्रान्समा सेप्टेम्बरको अन्त्यतिर सुरु भएको आन्दोलन तेस्रो हप्तामा पुगेको छ। अक्टोबर २४ मा भएको प्रदर्शनका क्रममा प्रहरी र प्रदर्शनकारीबीच झडप हुँदा लुटपाट र सार्वजनिक सम्पत्तिमा क्षति पुग्यो। त्यसपछि सरकारले शनिबारको प्रदर्शनका लागि ७० हजार प्रहरी परिचालन गरेको छ। गृहमन्त्री लरेन नुनेजले सम्भावित हिंसाविरुद्ध कडा कदम चाल्ने चेतावनी दिएका छन्। वाणिज्य संघका अनुसार खुद्रा व्यवसायमा एक अर्ब युरोभन्दा बढीको क्षति भएको छ भने तेस्रो त्रैमासिकमा अर्थतन्त्र खुम्चिएको छ। सरकारले दङ्गामा संलग्न व्यक्तिलाई १० हजार युरोसम्म क्षतिपूर्ति तिराउने कानुन अघि बढाएको छ। पेरिसको अदालतले रिपब्लिक र बास्टिल चोकबीचको जुलुसमाथिको प्रतिबन्ध सदर गरेको छ।
इटालीमा शुक्रबार देशव्यापी आमहडतालसँगै ४० भन्दा बढी सहरमा प्रदर्शन भए। आधारभूत श्रमिक सङ्गठनले आह्वान गरेको २४ घण्टे हडतालमा विद्यार्थी र श्रमिक सँगै सडकमा आए। टुरिनमा प्रहरीले पानीको फोहोरा प्रयोग गर्यो भने रोममा प्रदर्शनकारी कोलोसियम नजिकै भेला भए। मिलानमा रिङरोडमा मार्च भयो भने जेनोआ बन्दरगाहमा करिब १५ हजार मानिस भेला भएर हतियार ढुवानीको विरोध गरे।
जर्मनीमा ‘जेन्जेड रेगेल्ट’ नामक अभियानले शनिबार ३४ सहरमा प्रदर्शन आयोजना गरेको छ। बर्लिन, फ्र्यांकफर्ट र म्युनिखसहितका सहरमा एक लाख ६० हजारभन्दा बढी मानिस सहभागी हुने आयोजकको अपेक्षा छ। अधिकारीहरूले प्रदर्शन धेरैजसो शान्तिपूर्ण हुने अनुमान गरे पनि अतिवादी समूहले आन्दोलनको दुरुपयोग गर्न सक्ने चेतावनी दिएका छन्।
