डोल्पा । भेरी करिडोरको जाजरकोट–डोल्पा सडकखण्डमा पर्ने खदाङ पुलको निर्माण पाँच वर्ष बितिसक्दा पनि सुरु हुन सकेको छैन। २०७८ सालमा ठेक्का सम्झौता भएको पुलको काम स्थानबारेको विवादमा अल्झिएर ठप्प छ।
त्रिपुरासुन्दरी नगरपालिका–५, खदाङमा बन्ने पुलको विस्तृत परियोजना प्रतिवेदन आफूहरूको मागविपरीत तयार भएको स्थानीयको गुनासो छ। प्रतिवेदन बनाउने बेला जलविद्युत् आयोजनाका लागि भनिएको र केही स्थानीयको हस्ताक्षरसमेत नलिइएको उनीहरूले बताएका छन्। आफूहरूले माग गरेको ठाउँमा पुल नबनेसम्म काम अघि बढाउन नदिने अडान स्थानीयले लिएका छन्। मागअनुसार पुल बन्ने निश्चितता भए सहजीकरण गर्न तयार रहेको उनीहरूको भनाइ छ।
मंगलबार जिल्ला प्रशासन कार्यालय डोल्पामा प्रमुख जिल्ला अधिकारी जुनु हमाल ढकालको अध्यक्षतामा भएको छलफलमा पुल सेक्टरका प्रमुख तथा इन्जिनियर, निर्माण व्यवसायी, भेरी करिडोरका प्रतिनिधि र स्थानीय सहभागी भए। निर्माण व्यवसायीका प्रतिनिधि सागर भट्टराईले विवाद नभएको भए काम यसअघि नै अघि बढिसक्ने बताए। उनले कामका लागि अनुकूल वातावरण बनाइदिन प्रशासनसँग आग्रह गरे।
पुल सेक्टर नम्बर–५ सुर्खेतका कार्यालय प्रमुख देवेन्द्र भट्टराईले प्रतिवेदनमा उल्लेख भएको स्थानमा पुल बने प्रक्रिया छिटो अघि बढ्ने बताए। तर स्थानीयको मागले ढिलाइ भइरहेको उनले स्वीकार गरे। छलफलमा सबइन्जिनियर नवराज शर्मा र पुल सेक्टरका इन्जिनियर महेश विकले पनि पुलको अवस्थाबारे जानकारी गराए।
प्रमुख जिल्ला अधिकारी हमालले खदाङको विवाद समाधान गरी निर्माण तत्काल अघि बढाउन पहल गरिने बताइन्। खदाङको विवादका कारण छलगाडतर्फको पुलको काम रोक्न नहुने भन्दै उनले अन्य स्थानको निर्माणलाई तीव्रता दिन निर्देशन दिइन्।
यसअघि पनि पटक–पटक छलफल हुँदै आएको थियो। तत्कालीन भौतिक पूर्वाधार तथा यातायातमन्त्री माधव चौलागाईं डोल्पा पुगेका बेला पनि विवाद समाधानको प्रयास भएको थियो। त्यसबेला विवाद टुंगिएको भनिए पनि समस्या कायमै रहेको स्थानीयको भनाइ छ। नगरप्रमुखले समेत पटक–पटक झुक्याएको आरोप उनीहरूले लगाएका छन्।
मंगलबारको छलफलपछि सबै सरोकारवालाको चासो समेटेर थप समन्वय, अध्ययन र छलफल अघि बढाउने निर्णय भएको छ। ठेक्का भएको पाँच वर्ष पुग्न लाग्दासमेत कामले गति लिन नसक्दा भेरी करिडोरको उक्त खण्डमा आवतजावत र सडक पूर्वाधार विकासमा समेत असर परेको स्थानीयको भनाइ छ।
