पाकिस्तानको पञ्जाब प्रान्तमा भाइको हत्या गरेको आरोपमा दाजु पक्राउ परेका छन्। प्रहरीले सीसीटीभी फुटेजको विश्लेषणबाट घटनाको रहस्य खोलेको हो। मृतक मोहम्मद सुफियानको हत्या अक्टोबर १७ मा भएको थियो।
साउदी अरबमा रोजगारी गर्दै आएका दाजु मोहम्मद बिलालले त्यस दिन दिउँसो करिब डेढ बजे भाइलाई ह्वाट्सएपमार्फत फोन गरी गुजरात आउन भनेका थिए। उनले भेटमा विशेष कुरा रहेको बताएका थिए। भाइ मोटरसाइकल चढेर तोकिएको ठाउँमा पुग्दा दाजु नै त्यहाँ प्रतीक्षामा थिए। दुवैले सँगै खाना खाए र साँझ एउटै मोटरसाइकलमा घरतर्फ लागे। बाटोको सुनसान ठाउँमा पुगेपछि बिलालले भाइको घाँटीमा छुराले प्रहार गरेको प्रहरीको भनाइ छ। त्यसपछि उनले शव सडक किनारमा छाडे र भाइको मोबाइल तथा मोटरसाइकल लिएर गए। घटनालाई लुटपाटजस्तो देखाउने प्रयास गरिएको प्रहरीले जनाएको छ।
परिवारले राति करिब ८ बजेर ४५ मिनेटमा निर्माणाधीन पुल नजिकै सुफियान मृत फेला पारेको थियो। उनका पिता खालिद महमुदले प्रहरीमा उजुरी दिएका थिए। अनुसन्धानका क्रममा प्रहरीले गुजरात सहरको मेजर अजीज भट्टी सहिद अस्पताल अगाडिको सीसीटीभी हेर्दा सुफियान दिउँसो ३ बजेर ४२ मिनेटमा त्यहाँ पुगेर करिब एक घण्टा ४५ मिनेट कसैलाई पर्खिरहेको देखियो। पछि उनीसँग भेट गर्ने व्यक्ति दाजु बिलाल नै भएको पुष्टि भयो। रेस्टुरेन्टमा सँगै खाएको र सुनसान ठाउँमा करिब आधा घण्टा क्यामेराबाट टाढिएको दृश्यपछि बिलाल एक्लै मोटरसाइकलमा फर्किएको देखिएको थियो।
प्रहरीसमक्ष बिलालले हत्यामा संलग्नता स्वीकार गरिसकेका छन् र हत्यामा प्रयोग भएको छुरा बरामद भएको छ। दाजुभाइबीच पैतृक सम्पत्तिको अंशबण्डालाई लिएर मनमुटाव रहेको प्रहरीले जनाएको छ।
