काठमाडौँ — संघीय संसदका दुवै सदनमा गरी अहिले ३६ वटा विधेयक विचाराधीन अवस्थामा रहेका छन्। तीमध्ये प्रतिनिधि सभाका विभिन्न विषयगत समितिमा २४ वटा विधेयक अड्किएका छन् भने राष्ट्रिय सभाका कुनै पनि समितिमा विधेयक विचाराधीन छैन।
संघीय संसद सचिवालयका अनुसार शिक्षा, स्वास्थ्य तथा सूचना प्रविधि समितिमा सबैभन्दा धेरै ५ वटा विधेयक छन् भने अर्थ समितिमा ४ वटा छन्। अन्तर्राष्ट्रिय सम्बन्ध र पर्यटन, महिला तथा सामाजिक मामिला तथा कानुन, न्याय र मानव अधिकार समितिमा तीन-तीन वटा विधेयक विचाराधीन छन्। समितिमा रहेका विधेयकमा अर्थसम्बन्धी केही नेपाल ऐन संशोधन र खारेज गर्ने, राहदानी पहिलो संशोधन, भुक्तानी तथा फर्छ्योट, फोहोरमैला व्यवस्थापन, चलचित्र र खानी तथा खनिज पदार्थ विधेयक छन्।
प्रतिनिधि सभाबाट पारित भएर राष्ट्रिय सभामा प्रस्तुत हुन बाँकी एउटा विधेयक रहेको सचिवालयका प्रवक्ता एकराम गिरीले बताए। उनका अनुसार राष्ट्रिय सेवा दल विधेयकको सन्देश राष्ट्रिय सभामा प्रस्तुत हुन बाँकी छ। समितिबाट प्रतिवेदन तयार भइसकेका दुई विधेयक पनि सभामा विचाराधीन छन्। संवैधानिक निकायका पदाधिकारीको सेवा, सर्त र सुविधासम्बन्धी पहिलो संशोधन विधेयक, २०८३ को प्रतिवेदन सभामा पेस भइसकेको छ भने नेपाल राष्ट्र बैंक तेस्रो संशोधन विधेयकको प्रतिवेदन सचिवालयमा प्राप्त भएको छ।
यसैबीच संसदमा नयाँ विधेयक दर्ताको संख्या सात पुगेको छ। अधिवेशन अन्त्य हुने दिन संघीय निजामती सेवा विधेयक, २०८३ दर्ता भएको थियो। सरकारको सिफारिसमा राष्ट्रपति रामचन्द्र पौडेलले असोज १६ गते राति १२ बजेदेखि लागू हुने गरी अधिवेशन अन्त्य गरेका थिए। अधिवेशन बन्द भएपछि थप छ वटा विधेयक दर्ता भएका छन् — नेपाल नागरिक उड्डयन प्राधिकरण, नेपाल हवाई सेवा प्राधिकरण, सुशासन पहिलो संशोधन, भवन दोस्रो संशोधन, राष्ट्रिय सडक सुरक्षा र नवीकरणीय ऊर्जा तथा ऊर्जा दक्षतासम्बन्धी विधेयक। दुवै सदनबाट पारित भएर राष्ट्रपतिबाट प्रमाणीकरण भइसकेका विधेयकको संख्या १२ छ भने ६ वटा सन्धि तथा महासन्धि पारित भइसकेका छन्। दसैँ बिदापछि समितिमा विधेयक टुंगोमा पुर्याउने गरी छलफल अगाडि बढाउने तयारी गरिएको सचिवालयले जनाएको छ।
