धेरैले सामान्य ठान्ने मात्राको मदिरा सेवनले पनि स्वास्थ्यमा गम्भीर असर पार्न सक्ने नयाँ अध्ययनले देखाएको छ। अमेरिकाको रटगर्स विश्वविद्यालयका अनुसन्धानकर्ताहरूले गरेको यो विश्लेषण ‘जर्नल अफ स्टडिज अन अल्कोहल एन्ड ड्रग्स’ मा प्रकाशित भएको हो। अध्ययनले अकाल मृत्यु, अपाङ्गता, क्यान्सर र मुटुरोगको जोखिम बढ्ने निष्कर्ष निकालेको छ।
अनुसन्धान अमेरिकी सरकारको नयाँ राष्ट्रिय आहार सिफारिस तयार गर्ने क्रममा सुरु गरिएको थियो। हप्तामा औसत १४ पटक मदिरा पिउने व्यक्तिमा मदिराकै कारण जीवनभरमा मृत्यु हुने सम्भावना २५ जनामा एक जनासम्म पुग्ने अनुमान गरिएको छ। हप्तामा सात पटकसम्म पिउनेहरूमा भने धेरैजसो स्वास्थ्य समस्या केही मात्र बढ्ने देखिएको छ।
अध्ययनका प्रमुख लेखक डा. केभिन शिल्डका अनुसार पिउने मात्रा बढ्दै जाँदा जोखिम पनि त्यही अनुपातमा बढ्छ। ७ हजार २ सयभन्दा बढी वैज्ञानिक शोधपत्रको समीक्षा र राष्ट्रिय स्वास्थ्य तथ्याङ्कको विश्लेषणका आधारमा टोलीले फरक-फरक सेवन स्तरको असर मापन गरेको थियो।
निष्कर्षले थोरै पिउँदा मुटु बलियो हुन्छ भन्ने पुरानो मान्यतालाई पनि चुनौती दिएको छ। हल्का सेवनले इस्केमिक मुटुरोग र मस्तिष्कघातको जोखिम केही घटाउन सक्ने भए पनि क्यान्सर र अन्य दीर्घकालीन रोगलाई हेर्दा समग्र फाइदा जोखिमभन्दा निकै कमजोर हुने अनुसन्धानकर्ताहरूको भनाइ छ।
सह-लेखक डा. टिमोथी नैमीले दैनिक दुई पटकसम्मको सेवनलाई सामाजिक रूपमा मध्यम मानिए पनि त्यसले अकाल मृत्युको उल्लेख्य जोखिमसँग सम्बन्ध राख्ने बताए। महिला होस् वा पुरुष, दैनिक एक पटकभन्दा बढी सेवनपछि जोखिम तीव्र गतिमा बढ्ने अध्ययनले देखाएको छ। अनुसन्धानकर्ताहरूले व्यक्तिगत जीवनशैली र वंशाणुगत कारणले जोखिम फरक पर्न सक्ने भएकाले परिणामलाई जनसङ्ख्यास्तरको अनुमानका रूपमा बुझ्न आग्रह गरेका छन्।
